युनिकोड
मन्त्रिपरिषद्को बैठक बालुवाटारमा बसिरहेको छ।
प्रधानमन्त्री केपी शर्मा ओली चीनको औपचारिक भ्रमणमा निस्कनुअघि मन्त्रिपरिषद्को बैठक बसेको हो।
प्रधानमन्त्री केपी शर्मा ओली जनवादी गणतन्त्र चीनको औपचारिक भ्रमणका लागि भोलि (सोमबार) बिहान बेइजिङ प्रस्थान गर्दै छन्।
प्रधानमन्त्रीको नेतृत्वमा चीन जाने प्रतिनिधिमण्डल यसअघि नै मन्त्रिपरिषद्ले स्वीकृत गरिसकेको छ।
सत्ता साझेदार प्रमुख दल एमाले र कांग्रेसबीच बीआरआईमा साझा धारणा बनेपछि हिजै त्यसको प्रस्तावित खाका चीन पठाइसकिएको छ। प्रधानमन्त्रीको नेतृत्वमा चीन जाने प्रतिनिधिमण्डल यसअघि नै स्वीकृत भइसकेको छ।
बीआरआई सहकार्य फ्रेमवर्क नाम दिइएको उक्त प्रस्तावमा चिनियाँ पक्षको प्रतिक्रिया प्राप्त भइसकेको छैन।
परराष्ट्रमन्त्री परराष्ट्रमन्त्री डा आरजु राणा यसअघि नै चीन गएर त्यहाँका समकक्षीसँग वार्ता गरी शनिबार स्वदेश फर्किएकी थिइन्।
प्रधानमन्त्री ओली नेतृत्वको प्रतिनिधिमण्डल चिनियाँ प्रधानमन्त्री ली छ्याङको मैत्रीपूर्ण निमन्त्रणामा चार दिने भ्रमणमा जाँदै छन्। बिहान ११ गते उनी हिमालय एयरलाइन्सको चार्टर्ड उडानबाट बेइजिङ जानेछन्।
भ्रमणका क्रममा प्रधानमन्त्री ओलीले चीनका राष्ट्रपति सी जिनपिङसँग बेइजिङमा भेटवार्ता गर्ने कार्यक्रम तय भएको छ। परराष्ट्र मन्त्रालयका अनुसार, आफ्ना चिनियाँ समकक्षी लीसँग प्रतिनिधिमण्डलस्तरमा भेटवार्ता गर्नेछन्।
प्रधानमन्त्री ओलीसँग चीनको राष्ट्रिय जनकांग्रेसका स्थायी समिति अध्यक्ष झाओ लेजीको समेत भेट हुने तालिका छ। भ्रमणका क्रममा प्रधानमन्त्री ओलीले पेकिङ विश्वविद्यालयमा सम्बोधन गर्नेछन्।
उनले बेइजिङस्थित नेपाली दूतावास, चाइना काउन्सिल फर द प्रमोसन अफ इन्टरनेसनल ट्रेड र नेपाल उद्योग वाणिज्य महासंघको संयुक्त आयोजनामा हुने नेपाल–चीन व्यापार मञ्चलाई सम्बोधन गर्ने कार्यक्रम पनि तय भएको छ।
प्रधानमन्त्री ओलीका साथमा उनकी श्रीमती राधिका शाक्य पनि रहनेछिन्। यस्तै प्रधानमन्त्री ओली नेतृत्वको नेपाली प्रतिनिधिमण्डलमा परराष्ट्रमन्त्री डा आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, प्रधानमन्त्रीका आर्थिक तथा विकास सल्लाहकार डा युवराज खतिवडा, सांसदहरू, विशिष्ट श्रेणीका सरकारी अधिकारी, निजी क्षेत्रका प्रतिनिधि, सञ्चारकर्मीलगायत हुनेछन्।
प्रधानमन्त्री ओली मंसिर २० गते स्वदेश फर्कने तालिका छ।
प्रतिक्रिया