गोरखामा आजै मतगणना सक्ने तयारी

उपनिर्वाचन भएको गण्डकी प्रदेशको एकमात्र स्थान गोरखाको गोरखा नगरपालिका ५ मा ७ बजेबाट मतगणना सुरु हुने भएको छ।

मुख्य निर्वाचन अधिकृत शिव बहादुर रानाभाटका अनुसार मतदान सकिएर यहाँ दलका प्रतिनिधिबीच छलफल भइरहेको छ। अबको केही बेरमा मतगणना सुरु गर्ने उनले जानकारी दिए।

‘मतपेटिका संकलन भइसक्यो, अबको केही बेरमा हामी गणना सुरु गर्दैछौँ, रानाभाटले भने, ‘ गणना सुरु गर्नुअघिको छलफलमा छौं, सकेसम्म आजै सक्ने तयारी छ।’

उनका अनुसार समयमै गणना सकिएमा आज १०/११ बजेसम्ममा नतिजा घोषणा हुनेछ। यस वडामा वडा अध्यक्षका लागि ९ दलका उम्मेदवार प्रतिस्पर्धामा छन्।

२२ सय २५ मतदाता रहेको यहाँ आज भएको मतदानमा १३ सय ७३ मत खसेको छ। यो ६१ दशमलव ७१ प्रतिशत हो।