युनिकोड
राष्ट्रिय स्वतन्त्र पार्टी (रास्वपा)ले तिहारको दैउसी–भैलोमा पनि सभापति रवि लामिछाने पक्राउको विरोध गर्ने भएको छ।
सहकारी ठगी प्रकरणमा लामिछानेलाई गत कात्तिक २ गते काठमाडौँमा पक्राउ गरी पोखरा लगिएको थियो। उनको पक्राउविरुद्ध रास्वपाले लगातार सडकमा प्रदर्शन गरिरहेको छ।
सरकारले राजनीतिक प्रतिशोध साँधेर आफ्ना सभापतिलाई पक्राउ गरेको रास्वपाको आरोप छ।
उपसभापति डोलप्रसाद अर्यालले तिहार, छठजस्ता पर्व आएकाले त्यो अवधिमा पोखराबोहक अरू ठाउँमा सडक प्रदर्शन, धर्ना लगायतका कार्यक्रम नहुने बताए।
बरु, दैउसी–भैलो कार्यक्रममार्फत सरकारको कामकारबाही र पार्टी सभापतिमाथि प्रतिशोध साँधेकोबारे विरोध गरिने उनले बताए।
आर्यालले भने, ‘दैउसी–भैलो कै कार्यक्रममा पनि सरकारको डेलिभरी र सरकारले प्रतिशोध साँधेको विषय लिएर प्रदेशतिरका साथीहरूले कार्यक्रम राख्छौं भन्नु भएको छ।’
दैउसी–भैलो खेल्दा संयमित हुन र व्यक्तिगत गालीगलौजमा नउत्रिन निर्देशन दिइएको उनले जानकारी दिए। ‘संयमित हुने, गालीगलौजमा नउत्रिने, अरू पार्टीलाई गाली नगर्ने र व्यक्तिलाई गाली नगर्ने भनेर सल्लाह दिएको छु,’ आर्यालले भने।
पोखरामा भने तिहार, छठका बेला पनि निन्तर धर्ना दिने कार्यक्रम जारी रहने उनको भनाइ छ। ‘हाम्रो पोखराको धर्ना निरन्तर नै चलिरहन्छ,’ अर्यालले भने, ‘सभापति बाहिर नस्किन्जेल त्यो चली नै राख्छ।’
उनले आफूले आजै सभापति लामिछानेसँग भेटघाट गरेको र तिहार, छठजस्ता पर्वमा नागरिकलाई दुःख दिने गरी कार्यक्रम नगर्न आग्रह गरेको बताए।
‘म आज बिहान पार्टी सभापतिलाई पनि भेट्न गएको थिएँ,’ अर्यालले भने, ‘सभापतिज्यूसँग पनि कुरा हुँदा तिहार र छठमा नागरिकलाई दुःख दिनुहुँदैन, म आफ्नो लडाइँ लडिहाल्छु भन्नुभएको छ।’
तिहारपछि के कसरी अघि बढ्ने भन्ने विषयमा भने पार्टीमा छलफल भइहेको उनको भनाइ छ।
‘हामी सबै केन्द्रीय सदस्य, सांसदसँग छलफल गरिरहेका छौं। त्यसबारे निष्कर्ष निकाल्नचाहिँ अलिकति समय लाग्छ,’ उनले भने।
‘सभापतिज्यूसँग पनि सल्लाह लिनुपर्ने हुन्छ,’ उपसभापति अर्यालले भने, ‘उहाँले दिएको निर्देशन अनुसार हामी सल्लाह गरेर अगाडि बढाउँछौं।’
प्रतिक्रिया