युनिकोड
नेपाली कांग्रेसका सांसद चन्द्र भण्डारीले अर्का सांसद सुनिल शर्माविरुद्ध राज्य प्रतिशोधपूर्ण ढंगले उत्रिएको बताएका छन्।
शुक्रबार बसेको संसदीय दलको बैठकपछि पत्रकारहरुसँग कुराकानीका क्रममा उनले यस्तो बताएका हुन्।
‘सुनिल शर्मालाई थुन्नुपर्छ भन्ने छैन। जसको शक्ति त्यसको भक्ति भन्ने अब चल्दैन। मैले प्रधानमन्त्री र सीआईबी प्रमुखलाई यो गलत भयो भनिसकेको छु’, उनले भनेका छन्, ‘तत्कालीन अवस्थामा नवराज सिलवालले त्यसलाई अघि नबढाउने भनिसकेका छन्। बन्द गरिसकेको कुरा फेरि निकालेर कसैसँग प्रतिशोध साँध्नु गलत हो।’
कांग्रेस नेतासमेत रहेका भण्डारीले देशमा यति धेरै लुटपाट र भ्रष्टाचार हुँदा हुँदै सकिइसकेको मुद्दामा राज्य एउटा व्यक्तिको पछि प्रतिशोध साँध्न लाग्नु गलत भएको बताए।
‘नचाहिँदो कुरामा प्रतिशोधमा समात्ने होइन। सुनिल शर्माले बोलेको कसैलाई नपचेको होला नि!’, उनले भने, ‘कसैले जग्गा किनेपछि फिर्ता गर्दा पनि उन्मुक्ति पाउने। सुनिल शर्मालाई अदालतले सफाइ दिएको मुद्दामा फेरि थुन्नुपर्ने किन?’
उनले सुनिल शर्मा नेपालमै बसेको अवस्थामा सांसद जस्तो पदमा रहेको व्यक्तिलाई थुनेर गलत गरेको दोहोर्याए।
‘नेपाल छाडेर जानेलाई फूलमाला लगाउने तर नेपालमै बसेकालाई किन थुन्ने?’, उनले भने, ‘यसमा सरकारले ठीक गरे, प्रतिशोधमा उत्रिएर देश अघि बढ्दैन।’
प्रतिक्रिया