युनिकोड
भौतिक पूर्वाधार तथा यातायातमन्त्री प्रकाश ज्वालाले अहिलेको सत्ता गठबन्धन बलियो भएकाले कसैले चाहँदैमा नढल्ने दाबी गरेका छन्।
आइतबार जनकपुरधाम पुगेका मन्त्री ज्वालाले सञ्चारकर्मीहरुसँग कुरा गर्दै यस्तो बताएका हुन्।
उनले नेकपा एमालेप्रति लक्षित गर्दै गठबन्धन ढलोस् भनेर धुपबत्ती बाल्दैमा नढल्ने टिप्पणी गरे।
ज्वालाले प्रतिगमनविरुद्ध एकजुट भएर सडकदेखि अदालतसम्म लडेका शक्तिहरु एक ठाउँमा रहेको उल्लेख गर्दै गठबन्धन ढाल्ने सपना नदेख्न एमालेलाई भने।
उनले गठबन्धन ढालेर केही पाइहाल्छौँ की भन्ने आशा गर्नेहरुले आशावादी नबन्न पनि आग्रह गरेका छन्।
‘अहिलेको गठबन्धन बलियो धरातलमा उभिएको छ, यो कसैले ढलोस् भनेर चाहँदैमा, धुपबत्ती गर्दैमा ढल्दैन। यसको ग्राउण्ड छ। प्रतिगमनविरुद्ध एकजुट भएर सडकदेखि अदालतसम्म लडेका शक्तिहरु छन्। चुनावका बेलमा सँगै अघि बढेका शक्तिहरु एक ठाउँमा छन्’, उनले भने ‘जटिल मोडहरुमा एकतावद्ध भएका शक्तिहरु एक ठाउँमा छन्। यो ढलेर फाइदा पाइहाल्छौँ भनेर आशावादी भएकाहरुको आशा पूरा हुँदैन।’
मन्त्री ज्वालाले समाजवादी मोर्चा सरकार बलियो बनाउने र टिकाइरहने मात्रै नभइ गठबन्धनको दीर्घकालीन फाइदाका लागि बनेको बताए।
प्रतिक्रिया