प्रधानमन्त्रीले अब हरेक महिना सांसदहरूलाई जवाफ दिनुपर्ने

सभामुख देवराज घिमिरेले प्रधानमन्त्री पुष्पकमल दाहाल प्रचण्डसँगको प्रत्यक्ष प्रश्नोत्तर जेठ महिनादेखि सुरु हुने बताएका छन्।

प्रतिनिधिसभा कार्यव्यवस्था परामर्श समितिको आइतबार बसेको बैठकमा उनले नियमावलीअनुसार प्रधानमन्त्रीसँगको प्रत्यक्ष प्रश्नोत्तर जेठ महिनादेखि सुरु हुने बताएका हुन्।

प्रधानमन्त्रीसँगको प्रत्यक्ष प्रश्नोत्तरका लागि कानुन मन्त्री, दलका प्रमुख सचेतकहरु सँग छलफल गरेर समय निर्धारण गरिने सभामुख घिमिरेको भनाइ थियो।

‘नियमावलीअनुसार प्रधानमन्त्रीसँगको प्रत्यक्ष प्रश्नोत्तर जेठ महिनादेखि सुरु हुन्छ,’ बैठकमा उनले भने, ‘कानुनमन्त्री, मुख्य सचेतकसँग छलफल गरेर समय निर्धारण हुन्छ।’

सरकार संसदप्रति उत्तरदायी हुनुपर्नेमा जोड दिँदै घिमिरेले प्रधानमन्त्री र मन्त्रीहरुको उपस्थितिलाई पनि कानुनमन्त्रीमार्फत् सरकारको ध्यानाकर्षण गराउने बताए।