युनिकोड
आफ्नो देशका एक ठेकेदारको मृत्यु भएपछि अमेरिकी सेनाले इराक र सिरियास्थित इरानसमर्थित लडाकु शिविरमा आक्रमण गरेको थियो।
जवाफमा इरानले भनेको छ,‘अमेरिकाले सार्वभौम मूलुकमा आक्रमण गरेर यस देशको स्वतन्त्रताको धज्जी उडाएको छ। यसले अमेरिकाले आतंकवादलाई खुला समर्थन गरेको देखिन्छ।’
इरानको सरकारी समाचार संस्था आइआरएनएका अनुसार इरानी विदेश मन्त्रालयका प्रवक्ता अब्बास मोसाभीले भनेका छन्,‘अमेरिकाले अवैध आक्रमणको जिम्मेवारी लिनुपर्छ। यसको परिणाम भोग्न तयार हुनुपर्छ।’
आइतबारको अमेरिकी आक्रमणमा २५ जनाको मृत्यु भएको र ५१ जना घाइते भएको सीएनएनले जनाएको छ।
हिज्बुल्लाह समूहले नियन्त्रणमा लिएका क्षेत्र र उनीहरूले हातहतियार भण्डारण गर्ने स्थानलाई निसाना बनाएर अमेरिकाले आक्रमण गरेको पुष्टि गरेको थियो।
अमेरिकाले हिज्बुल्लाहलाई आतङ्कवादी सङ्गठन मानेको छ।
गत हप्ता किर्कुकमा भएको रकेट आक्रमणमा परेर एक अमेरिकी ठेकेदारले ज्यान गुमाएका थिए भने कैयौँ अमेरिकी सेना तथा इराकका अधिकारीहरू घाइते भएका थिए।
उक्त आक्रमण हिज्बुल्लाहले गरेको बताउँदै अमेरिकाले हिज्बुल्लाहले नियन्त्रणमा लिएका इरान र सिरियाली क्षेत्रमा आक्रमण गरेको थियो।
प्रतिक्रिया