प्रधानमन्त्रीले व्यवसायीलाई भने : वैदेशिक रोजगारीका विकृत अन्त्य गरौँ

प्रधानमन्त्री पुष्पकमल दाहाल प्रचण्डले आफ्नो तेस्रो कार्यकालमा देशलाई केही दिने गरी काम हुने बताएका छन्। 

नेपाल वैदेशिक रोजगार व्यवसायी संघले शुक्रबार गरेको २९ औँ साधारण सभाको उद्घाटन गर्दै प्रधानमन्त्रीले तेस्रो कार्यकालमा विदेशमा रहेका नेपालीको हितलाई केन्द्रमा राखेर काम गर्ने बताएका हुन्।

‘म दोस्रोपटक प्रधानमन्त्री हुँदा विदेशमा रहेका नेपालीहरूको हितका पक्षमा केही महत्वपूर्ण काम गरेको थिएँ’, उनले भने, ‘विदेशमा रहेका नेपालीहरूको बीमा, श्रम स्वीकृति, क्षतिपूर्ति रकममा वृद्धि लगायत महत्वपूर्ण काम भएका थिए। यसपटक विदेशका नेपालीको हितलाई केन्द्रमा राखेर थप काम गर्नुछ, म त्यो गर्छु।’

प्रधानमन्त्रीले आफ्नो तेस्रो कार्यकाल मुलुकको विकास, समृद्धि र सुशासनका निम्ति चुनौतीपूर्ण अवसर भएको बताए। 

‘देशलाई केही दिनैपर्ने परिस्थितिमा प्रधानमन्त्री भएको छु,’ उनले भने, ‘देशलाई केही न केही परिणाम दिनुछ र दिन्छु।’

प्रधानमन्त्रीले वैदेशिक रोजगारीमा थुप्रै समस्या रहेको भन्दै त्यसतर्फ विशेष ध्यान दिन व्यवसायीहरूलाई आग्रह गरे। 

‘अघिल्लो वर्ष वैदेशिक रोजगारीमा थुप्रै समस्या रहेका समाचार मैले सुनेको छु। यो व्यवसाय संवेदनशील छ’, उनले भने, ‘यसलाई व्यवस्थित र मर्यादित बनाउनै पर्छ। यसभित्र थुप्रै विकृति र विसंगति छन्, अन्त्य गर्नुपर्छ। मेरो विश्वास छ, सरकारको प्रयासमा तपाईँहरूको साथ हुनेछ।’