प्रधानमन्त्रीको सरकारी निवास बालुवाटारमा सत्ता साझेदार सात दलको बैठक सुरु भएको छ।
प्रदेश सरकार निर्माणको समय आइसकेपछि सहमति जुटाउन सात दलको बैठक बसेको हो।
यो बैठकले सातै प्रदेश प्रमुख र मुख्यमन्त्रीको बाँडफाँट सकेसम्म आजै टुंगो लगाउने तयारी छ।
प्रधानमन्त्रीको सरकारी निवास बालुवाटारमा बसिरहेको बैठकबाट ७ वटै प्रदेशका प्रमुख, मुख्यमन्त्री, सभामुख, उपसभामुख र मन्त्रीहरु बाँडफाँटमा सहमति जुटाउने भएको छ।
बैठकमा नेकपा एमालेका अध्यक्ष केपी शर्मा ओली, प्रधानमन्त्री पुष्पकमल दाहाल प्रचण्ड, राष्ट्रिय स्वतन्त्र पार्टीका सभापति रवि लामिछाने, राष्ट्रिय प्रजातन्त्र पार्टीका अध्यक्ष राजेन्द्र लिङ्देन र जनता समाजवादी पार्टीका अध्यक्ष उपेन्द्र यादव पनि सहभागी छन्।
त्यसैगरी बैठकमा जनमत पार्टीका अध्यक्ष डा. सीके राउत पनि सहभागी छ। बैठकमा नागरिक उन्मुक्ति पार्टीका प्रतिनिधि भने पुगेका छैनन्।
आइतबार प्रदेश १ मा नेकपा एमाले संसदीय दलका नेता हिक्मत कार्की चौथो मुख्यमन्त्रीमा नियुक्त भइसकेका छन्।
त्यहाँ उनलाई माओवादी, राप्रपा र जसपाका सांसदहरुले समर्थन गरे। उनी करिब दुईतिहाइ अर्थात् ६० सांसदको समर्थनमा आइतवार मुख्यमन्त्री बनेका हुन्।
प्रदेश १ मा एमालेका ४०, माओवादीका, राप्रपका ६ र जसपाका १ सहित ६० सांसदको समर्थनमा कार्की मुख्यमन्त्री भए।
प्रदेश १ का माओवादी सांसद इन्द्र आङ्बोले सभामुख पद आफूहरु लिने बताएका छन्। तर, सभामुखको नाम एक दुईदिनभित्र टुंगो लगाउने उनको भनाइ छ।
यस्तै अन्य ६ वटा प्रदेशहरु बाँडफाँटबारे बैठकले सहमति गर्ने नेताहरु बताउँछन्। प्रधानमन्त्री प्रचण्डले यही मंगलबार विश्वासको मत पनि लिँदैछन्।
Shares
प्रतिक्रिया