झडपमा घाइते सांसद साहलाई उपचारका लागि काठमाडौं लगियो

सर्लाहीमा बाटो बनाउने विषयमा शनिबार दुई समूहबीच भएको झडपमा परी गम्भीर घाइते झएका जनता समाजवादी पार्टीका सचेतक एवं प्रतिनिधि सभाका सदस्य प्रमोद साहलाई थप उपचारका लागि हेलिकप्टरबाट काठमाडौं लगिएको छ। 

बयलबासमा समान्य उपचारपछि उनलाई शनिबार दिउँसो सिम्रिक एयरको हेलिकप्टरबाट काठमाडौं लगिएको सर्लाही जिल्ला प्रहरी कार्यालयका प्रवक्ता डीएसपी माधवप्रसाद बुढाथोकीले जानकारी दिए।  

शनिबार बिहान ईश्वरपुर नगरपालिकास्थि बयलवासमा बाटो विस्तार गर्ने विषयमा दुई समूहबीच झडप भएको हो। त्यस क्रममा ढुंगाले लागेर सांसद साहको टाउकामा गहिरो चोट लागेको हो। टाउकामा झन्डै १० सेन्टिमिटर काटिएको छ। 

स्थानीय फुलजोर युवा क्लबको भवन भत्काइएको विषयमा विवाद भएको हो। सांसद साहले उक्त भवन त्यही ठाउँमा नभएर अन्यत्र बनाउनुपर्ने भनेपछि झडप भएको हो। आक्रमण गर्नेहरू नेकपा एमालेका स्थानीय कार्यकर्ता रहेको बताइएको छ। 

प्रहरी मुकदर्शक हुँदा घटना भएको प्रत्यक्षदर्शीले बताएका छन्। आक्रमणमा उनका पीएसओ पनि घाइते भएका छन्। पीएसओको टाउकामा चारवटा टाँका लागेको छ। प्रहरीकै अगाडि पीएसओको हतियार पनि आक्रमणकारी पक्षले खोसेको थियो। तर, फेरि तुरन्तै फिर्ता गरेका थिए । 

आक्रमण गर्ने समूहले स्थानीय राजीव महतोको मोटरसाइकल प्रहरीकै अगाडि जलाएका छन्।