सप्तकोसीमा बढ्यो पानीको बहाव, ४९ ढोका खोलियो

निरन्तरको वर्षासँगै सप्तकोसी नदीमा पानीको बहाव तीव्र गतिमा बढ्दै गएको स्थानीय प्रशासनले जनाएको छ।

पानीको बहाव र जलस्तर तीव्ररूपमा गएपछि ४९ वटा फाटक (ढोका) खोलिएको छ।

जिल्ला प्रशासन कार्यालय सप्तरीका अनुसार हजारौँ क्यूसेकको रफ्तारमा पानीको बहाव बढ्दै गएको हो।

सप्तरी प्रशासनले दिएको जानकारीअनुसार दिउँसो २ बजेसम्म एक लाख ८१ हजार ६ सय क्युसेक रहेकोमा दिउँसो ४ बजेसम्म एक लाख ९० हजार ३९० क्युसेकको रफ्तारले बढेको छ।

पानीको बहावसँगै जलस्तर बढ्दै गएपछि कोसीका ५६ वटा फाटकमध्ये ४९ वटा फाटक खोलिएको प्रमुख जिल्ला अधिकारी श्यामकृष्ण थापाले जानकारी दिएका छन्।

पानीको स्तर बढ्दै गएको दृष्टिगत गर्दै रातो बत्ती बालिएको छ। कोसीमा पानीको बहाव एक लाख ५० हजार क्यूसेक नाघेपछि उच्च सतर्कताको संकेतस्वरूप रातो बत्ती बाल्ने नियम रहेको छ।

पानीको बहाव तीव्र गतिमा बढ्दै गएपछि सप्तरी प्रशासनले सम्भावित बाढी, डुबान र कटानको जोखिमलाई ध्यानमा राख्दै उच्च सतर्कता अपनाउन आग्रह गरेको छ।

बढ्दो जलप्रवाहको अवस्थाबारे जानकारी लिन सप्तरीका प्रमुख जिल्ला अधिकारी थापाले नेपाल प्रहरी, सशस्त्र प्रहरी र राष्ट्रिय अनुसन्धानका अधिकारीहरूसँगै कोसी ब्यारेजको स्थलगत निरीक्षण गरेका थिए।

अनुगमनपछि प्रमुख जिल्ला अधिकारी थापाले जिल्लामा विपद् प्रतिकार्य योजना प्रभावकारीरूपमा कार्यान्वयन गर्न निर्देशननै दिएका थिए। उनका अनुसार बाढीजन्य जोखिमलाई ध्यानमा राख्दै सम्बन्धित सबै निकायको जिम्मेवारी निर्धारण गरिसकिएको छ भने आवश्यक निर्देशन समेत दिइसकिएको छ।