मधेसः निर्माण व्यवसायीले पूर्वाधार कार्यालय र कोलनिकामा गरे तालाबन्दी

सम्पन्न योजनाको भुक्तानी रोकिएको भन्दै धनुषाका निर्माण व्यवसायीहरूले भौतिक पूर्वाधार विकास कार्यालय धनुषा र कोष लेखा तथा नियन्त्रकको कार्यालय मधेस प्रदेश जनकपुरधामको कार्यालयमा तालाबन्दी गरेका छन्।
 
निर्माण व्यवसायी संघ धनुषाको अगुवाइमा निर्माण व्यवसायीहरूले ती कार्यालयहरूमा तालाबन्दी गरेका हुन्। 

आर्थिक वर्षको अन्तिम दिनसम्म पनि सम्पन्न तथा अन्तिम चरणमा पुगेका योजनाहरूको भुक्तानी मधेस सरकारको अर्थ मन्त्रालयले स्वीकृति नलिएको भन्दै रोकेपछि निर्माण व्यवसायीहरू आक्रोशित भएका छन्।
 
निर्माण व्यवसायी संघ धनुषाका पूर्व महासचिव विनोद कर्णले असार मसान्तमा विकास बजेट खर्च गर्ने समयमै भुक्तानी रोकिँदा निर्माण व्यवसायी गम्भीर आर्थिक संकटमा परेको दुःखेसो पोखेका छन्। ३१११२ शीर्षक नम्बरको विभिन्न जातीय मठमन्दिरलगायतका आवासीय निर्माणतर्फको योजनाको रकमको भुक्तानी अर्थ मन्त्रालयले रोकेको हो।