युनिकोड
राष्ट्रिय स्वतन्त्र पार्टीका अध्यक्ष रवि लामिछानेले मंगलबार कर्णाली प्रदेशको सुर्खेतमा विशाल जनसभा गरेका छन् । रविको सभामा ठूला दलको भन्दा राम्रो उपस्थिति देखिएको प्रत्यक्षदर्शीको दाबी छ ।
रविको कार्यक्रममा देखिएको उपस्थितिबारे कर्णालीका पत्रकार पंखबहादुर शाहीको प्रतिक्रिया छ, ‘लामिछाने दाइको क्रेज गज्जब देखियो कर्णालीमा ! यति मान्छेहरु कुनै पनि पार्टीको कार्यक्रममा उपस्थित भएको देखिएको थिएन ।’
त्यसो त आफ्नो सभामा मानव सागर उर्लिएको देखेपछि रवि उत्साही बनेका छन् । कार्यक्रमलगत्तै लामिछानेले पत्रकार विजयकुमारलाई भने, ‘जब राष्ट्रिय स्वतन्त्र पार्टीले आगामी चुनाव जित्ला, जब मैले कुनै ठूलो नेतालाई यही चुनावमा रोकौंला, तब मलाई गिल्ला गर्नेहरु नै – रबि लामिछानेको सफलताका ७ कारण भनेर ब्रेकिङ हेडलाइन दिन तँछाड मछाड गर्नेछन्।’
चुनावको तयारीस्वरुप देशैभरि कार्यक्रम गरिरहेका लामिछाने मंगलबार कर्णाली पुगेका हुन् । कार्यक्रममा उनले भने, ‘मृत्युलाई आँखै अगाडि देखेर आएको हुँ, म कसैसँग डराउँदिनँ ।’
देशमा भरोसा गर्न योग्य नेता कोही नभएकाले आफू राजनीतिमा आएको बताउँदै लामिछानेले राजनीतिमा देखिएको फोहोर सफा गर्ने प्रतिवद्धतासमेत जनाए ।
प्रतिक्रिया