युनिकोड
जेनजी आन्दोलनको क्रममा प्रहरी कार्यालयमा लुटपाट र तोडफोड गर्ने २ जनालाई कास्की प्रहरीले पक्राउ गरेको छ।
प्रहरीका अनुसार जेनजी आन्दोलनका क्रममा विभिन्न प्रहरी कार्यालयमा आगजनी, तोडफोड र हातहतियार लुटपाट गर्ने गतिविधिमा उनीहरू संलग्न थिए।
पक्राउ पर्नेहरूमा पोखरा महानगरपालिका वडा नं. ०५ बस्ने ३१ वर्षीय श्यामबहादुर तमाङ र वडा नं. ०२ बस्ने २२ वर्षीय सागर राउत रहेका छन्।
उनीहरूका साथबाट प्रहरीले १ राउन्ड गोली, बोल्ट र ट्रिगरको भाग जोडिएको थान, काठको बटको भाग र २ वटा मोबाइल बरामद गरेको जनाएको छ। पक्राउ परेका श्यामबहादुर तमाङ दुई वर्षअघि चोरी मुद्दामा समेत परेका थिए।
पक्राउ परेका दुवै जनालाई हातहतियार तथा खरखजना सम्बन्धी मुद्दामा ५ दिन म्याद थप गरी कास्की जिल्ला अदालतबाट अनुसन्धान प्रक्रिया अघि बढाइएको जिल्ला प्रहरी कार्यालय कास्कीका सूचना अधिकारी हरीबहादुर बस्नेतले जानकारी दिए।
प्रतिक्रिया