नेगेटिभ रिपोर्ट आएको चर्चा चलेपछि अमिताभले भने : यो सत्य हाेइन

कोरोना भाइरसको संक्रमणसँग जुधिरहेका बलिउडका महानायक अमिताभ बच्चनले आफ्नो रिपोर्ट नेगेटिभ आएको भन्ने समचारको खण्डन गरेका छन्।

बिहीबार भारतका केही मिडिया र सामाजिक सञ्जालमा महानायक बच्चनको कोरोना रिपोर्ट नेगेटिभ आएको समाचार सार्वजनिक भएपछि उनले त्यसको खण्डन गरेका हुन्।

‘यो समाचार असत्य, गैरजिम्मेवार, गलत र सच्याउनै नसकिने झुट हो’, सामाजिक सञ्जाल ट्विटरमा उनले लेखेका छन्।

महानायक बच्चन र उनका छोरा अभिनेता अभिषेक बच्चनमा जुलाई ११ मा कोरोना पोजिटिभ देखिएको थियो। स्वासप्रस्वासमा समस्या देखिएपछि उनी उपचारका लागि मुम्बईको नानावटी अस्पताल पुगेका थिए। सोही अस्पतालमा गरिएको कोरोना परीक्षणमा बाबुछोरामा नै कोरोना पोजिटिभ देखिउको थियो।

त्यसको भोलिपल्ट अर्थात जुलाई १२ मा अभिषेक पत्नी ऐश्वर्या र छोरी आराध्यामा पनि कोरोना पुष्टि भएको थियो।