युनिकोड
मेघौली फिल्म्सको ब्यानरमा निर्माण भएको डार्क कमेडी फिल्म ‘जिरो डिग्री’को फर्स्ट लुक भिडिओ सार्वजनिक गर्दै प्रदर्शन मिति घोषणा गरिएको छ। फर्स्ट लुकमार्फत चलचित्रको प्रदर्शन मिति यही वर्षको तिहारलाई तय गरिएको हो।
सार्वजनिक भिडिओमा अभिनेता विजय बराललाई पुन्य चौलागाईँ नामक वडाध्यक्षको भूमिकामा देख्न सकिन्छ। जो उनका यसअघिका भूमिकाभन्दा निकै फरक र रोचक छ।
फर्स्ट लुक भिडिओमा पृष्ठभूमिबाट गुन्जिने ‘जहाँ समस्या त्यहाँ पुन्य चौलागाईं’ भन्ने संवादबाट सुरु हुन्छ। जुन संवादले उनी गाउँको एक चलाख र चतुर जनप्रतिनिधि हुन् भन्ने प्रस्ट पार्छ। बाक्लो जुँगा, चस्मा, ढाका टोपी र सुटमा सजिएका विजय बरालको एउटा दृश्य निकै प्रतीकात्मक र व्यङ्ग्यात्मक छ।
‘पुन्य चौलागाई वडाध्यक्ष’ लेखिएको नेमप्लेट अगाडि बसेर उनले पैसा बुझिरहेका (लेनदेन गरिरहेका) छन्। तर, उनको पछाडि भित्तामा टाँसिएको बोर्डमा भने ठूला अक्षरले ‘भ्रष्टाचारलाई रोकौँ ’ लेखिएको छ। यसले चलचित्रमा नेपाली राजनीतिको यथार्थ र नेताहरूको दोहोरो चरित्रलाई डार्क कमेडीको माध्यमबाट कसिलो व्यङ्ग्य प्रहार गरिएको सङ्केत गर्छ।
यसका साथै, वडाध्यक्ष पुन्य चौलागाईँ सेतो घोडामा चढेर हातमा दुई वटा स्ट्यान्ड फ्यान बोकेर हिँडिरहेको र गाउँलेहरूले पहाडी बाटोमा ठूलो काठको बाकस बोकेर हिँडिरहेको दृश्यले कथाको गहिराइलाई थप रहस्यमयी बनाएको छ। चलचित्रको कथा सडक सञ्जाल राम्रोसँग नपुगेको एक विकट गाउँमा आमाबुवाको निधन भएपछि विदेशमा रहेका सन्तान नफर्किन्जेल शवलाई सुरक्षित राख्न ‘डीप फ्रिज’ बोकेर गाउँ उक्लिँदा आइपर्ने उथलपुथल परिस्थितिमा केन्द्रित छ।
यस फिल्ममा ‘बेहुली फ्रम मेघौली’ निर्माण तथा निर्देशन गर्ने जोडी सजन काफ्ले र आकास बरालको संयुक्त निर्देशन एवं पटकथा रहेको छ। कास्कीको धिताल गाउँ, अर्मलाकोट, घार्मी र बगर लगायतका रमणीय बस्तीहरूमा यसको छायांकन गरिएको छ।
फिल्ममा विजयसहित प्रकाश घिमिरे, राजन भुसाल, सनिशा भट्टराई, वसुन्धरा भुसाल, रमेश बुढाथोकी, लोकेन्द्र लेखक, सन्जोग रसाइली लगायतका कलाकारको अभिनय रहेको छ।
मोती कार्की कार्यकारी निर्माता रहेको चलचित्रलाई निशाल पौडेलले खिचेका हुन् भने चानस पुन मगरको सम्पादन, राजेन्द्र मोक्तानको रङ्ग संयोजन र अङ्कित बाबु अधिकारीको सङ्गीत रहेको छ।
प्रतिक्रिया