‘मास्टर्नी’ का दुई पोस्टरले के संकेत गर्छ?

आयंका फिल्म्सको प्रस्तुतीमा बनेको फिल्म ‘मास्टर्नी’ का दुई पोस्टर सार्वजनिक भएको छ।  केहि समय अगाडी प्रियंका कार्कीको एकल पोस्टर ल्याएपछि निर्माण टिमले दुई फरक नयाँ पोस्टर सार्वजनिक गरेको हो।  

पहिलो पोस्टरमा अभिनेत्री प्रियंका कार्की र सिम्रन खड्कालाई देख्न सकिन्छ।  जहाँ सिम्रन प्रियंकाको अँगालोमा छिन्।  यसले केही भावुकता जनाउछ। चलचित्रले आमा छोरीको कथा रहेको दर्शाउछ। 

दोस्रो पोस्टरमा चलचित्रका तीन मुख्य कलाकार फिचर्ड छन्।  प्रियका र सिम्रनसहित प्रमोद अग्रहरीलाई देख्न सकिन्छ। क्राइम स्पटमा प्रहारीले प्रयोग गर्ने 'नेपाल प्रहरी अपराध घटनास्थल प्रवेश निषेध' ले कुनै घटना घटेको र प्रहरीले अनुसन्धान गरिरहेको अनुभूति गराउँछ।   हराएका व्यक्तिहरु समावेश ब्याकग्राउन्डले रहस्य र अपराधको संकेत दिएको छ। 

त्यस्तै, "उनले अपराध रोजिनन्, उनले त केवल आफ्नी छोरी रोजिन्।", भन्ने ट्यागलाइनले आफ्नी छोरी बचाउनका लागी आमाले गरेको कुनै कामको संकेत गर्छ।   

प्रियंका कार्की, क्याबिनेट श्रेष्ठ, आयुष्मान जोशी र प्रनित कार्की निर्माता रहेको फिल्मलाई शुभेन्दु घोषले निर्देशन गरेका हुन्। फिल्ममा प्रियंका, सिम्रन र प्रमोदसहित आर्यन सिग्देल, सरोज खनाल, गौरी मल्ल, ऋचा शर्मा,  अनुपविक्रम शाही, रक्षा थापा, दिनेश काफ्ले लगायतका कलाकारको अभिनय छ ।

चलचित्रको कार्यकारी निर्माता सुरक्षा सिंह मलहोत्रा हुन् भने क्रिएटिभ निर्माताको रूपमा सिमोस सुनुवार रहेका छन्। प्रियंका कार्कीको कथा रहेको चलचित्रको स्क्रिप्ट शान बस्नेतले तयार पारेका हुन् भने प्रियंका र शान मिलेर डाइलग लेखेका छन्। 

भदौ ५ गतेबाट हलमा लाग्ने फिल्मलाई नेपालीसहित अन्य भाषामा एकसाथ रिलिज गर्ने तयारीमा निर्माण टिम रहेको छ ।