युनिकोड
नेपाली संगीत क्षेत्रमा स्थापित नाम हरि लम्साल अब चलचित्र निर्देशनमा पनि देखिने भएका छन्। उनकै लेखन तथा निर्देशनमा ‘बा : एक योद्धा’ को छायांकन सुरु भएको छ।
काठमाडौँको पशुपतिनाथ मन्दिर परिसरमा विधिपूर्वक पूजाआजा गर्दै निर्माण कार्यको थालनि गरिएको हो। आर्टिस्टिक इन्टरटेनमेन्टको ब्यानरमा निर्माण हुन लागेको यो चलचित्रले नेपाली समाजको एउटा मार्मिक पक्षलाई उजागर गर्ने लक्ष्य राखेको छ।
लामो समयदेखि गायक र संगीतकारको रूपमा दर्जनौँ चर्चित गीतहरू दिइसकेका हरि लम्सालले यसै चलचित्रमार्फत निर्देशकको रूपमा डेब्यु गर्दै छन्। ल्मको कथा र पटकथा पनि लम्सालले नै तयार पारेका हुन्।
नेपाली परिवारमा बुवाको महत्त्व, उनले सन्तानको भविष्यका लागि गर्ने त्याग, संघर्ष र जीवनभर झेल्ने चुनौतीलाई एउटा ‘योद्धा’को रूपमा चित्रण गर्न खोजिएको जनाइएको छ। विशेषगरी ग्रामीण तथा सहरी समाजमा एउटा बाबुले बोक्ने जिम्मेवारीको कथालाई यो चलचित्रले पर्दामा उतार्नेछ।
यस फिल्ममा सिनेमेटोग्राफर शिवराम श्रेष्ठको छायाकंन रहनेछ। श्रेष्ठले यसअघि चर्चाको शिखरमा रहेका र व्यापारिक रूपमा ब्लकबस्टर सावित भएका चलचित्रहरू ‘पूर्ण बहादुरको सारङ्गी’, ‘बोक्सीको घर’ र ‘परान’ जस्ता सिनेमाहरू खिचेर आफ्नो कौशल प्रदर्शन गरिसकेका छन्।
यस चलचित्रका निर्माता वसन्त लम्साल हुन्। गायक तथा सर्जक समेत रहेका लम्सालले यस अघि अभिनेता विपिन कार्कीलाई लिएर चलचित्र ‘कर्मा’ निर्माण गरेका थिए। फिल्मको मुख्य सहायक निर्देशकमा तारा नाथ न्यौपाने रहेका छन्।
निर्माण पक्षले चलचित्रको छायांकन सुरु गरिसके पनि मुख्य भूमिकामा रहने कलाकारहरूको नाम भने अहिलेसम्म गोप्य नै राखेको छ। ‘सप्राइज’ दिने उद्देश्यले कलाकारहरूको नाम सार्वजनिक नगरिएको निर्माण टोलीको भनाइ छ।
आर्टिस्टिक इन्टरटेनमेन्टले यसअघि पनि स्तरीय प्रोजेक्टहरूमा काम गर्दै आएकाले यस चलचित्रबाट दर्शकलाई एक भावनात्मक र सामाजिक विषयवस्तुमा आधारित सोशल ड्रामा युक्त मनोरञ्जनात्मक सिनेमा दिने अपेक्षा राखेको छ। निर्माण पक्षका अनुसार छायांकनको सम्पूर्ण कार्य सकिएपछि मात्र चलचित्रको प्रदर्शन मिति तोकिनेछ।
प्रतिक्रिया