शान्तिश्रीसँग स्टेज संवाद : बोलमाया गाउँदा धेरैपटक रोएकी छु

स्टेज चढेपछि एकचोटीमा कतिवटा गीत गाउनुहुन्छ?
एकचोटीमा स्टेजमा जाँदा ८/१० गीत गाउन्छु। जसमा चर्चित गीतहरु छुट्दैनन्।

स्टेजमा कुन गीत गाउँदा दर्शकले बढी रमाइलो मान्नुहुन्छ वा वान्समोर भन्नुहुन्छ?
प्राय: सबैजसो गीतमा रमाउनुहुन्छ। तर, धेरैजसो गलबन्दीमा बढी वान्समोर आउँछ। यसपटक त अरेली काँडेले गीतको पनि वान्समोर आइरहेको हुन्छ। 

नछुट्ने गीतहरु कुन-कुन हुन्?
हरेक स्टेजमा नछुट्ने गीत गलबन्दीनै हो। अहिले अरेली काँडै बनेको छ। यस गीतको पनि दर्शकले निकै खोज्नुहुन्छ। 

स्टेजमा गइसकेपछि कति घण्टा प्रस्तुति दिनुहुन्छ?
मैले अहिले एक घण्टाजति प्रस्तुति दिइरहेकी हुन्छु। 

कार्यक्रमको लागि धेरै ठाउँ पुग्नुभएको छ। अहिलेसम्म यादगार प्रोगाम कहाँको रह्यो?
गतवर्ष म आफ्नै गृहजिल्ला रोल्पाको महोत्सवमा गएकी थिए। जहाँ मेरो बुवामम्मी पनि आउनुभएको थियो। प्रस्तुति दिनुअघि मैले उहाँहरुलाई स्टेजमा बोलाएर खादा लगाएर सम्मान गरे। उहाँहरुकै अघि चर्चित गीतहरु गाउने मौका पाए।  त्यो कार्यक्रम निकै याद आउँछ। आमाबुवालाई स्टेजमा बोलाएर खादा लगाएर स्टेजको सुरुवात गर्नु मेरोलागि ठूलो कुरा थियो। उहाँहरु निकै खुसी हुनुभएको थियो। त्यो पल म कहिल्यै बिर्सिदिन। 

अनि अडियन्ससँगको मिठो अनुभव छैन?
एउटा सानो बाबु आएर माया गरेको निकै सम्झना आउँछ। बोलमाया सार्वजनिक भइसकेको थियो। महोत्सवको लागि म नवलपुरको पुगेकी थिए। महोत्सवमा बोलमाया गीतमा प्रस्तुति सुनेपछि सात/आठ वर्षको बाबु स्टेजमा आउनुभयो। बाबुले स्टेजमा आएर रुन्चे अनुहारमा म तपाईंलाई किस गर्न सक्छु भन्नुभयो। खासमा बोलमायाको कथाजस्तै उहाँको रियलमा भएको रहेछ। उ पेटमा हुँदाखेरी बुवा विदेशमा बितेको रहेछन्। जसले गीत सुनेपछि उहाँ निकै भावुक भएर मलाई भेट्नु आउनुभयो। मैले बाबुलाई काखमा लिँदा उहाँले चुम्बन गर्नुभएको थियो। त्यतिबेला म पनि निकै इमोसनल भएकी थिए। 

तपाईं आफैँ पनि भावुक हुनुहुन्छ। गीत गाउँदा गाउँदै कहिले रुनुभएको छ?
स्टेजमा प्रस्तुति दिँदा धेरैपटक रोएकी छु नी। बोलमाया गीत गाउँदा दर्शकहरु रुदा म पनि निकै रोएकी छु। बोलमाया गीत सुन्दा अडियन्स रोइरहेको देखिन्छ। त्यो देखेर मेरो आँखामा पनि कैयौपटक आँशु आएको छ। 

तपाईंलाई मन पराउने दर्शकस्रोता निकै हुनुहुन्छ। मेला महोत्सवमा जाँदा दर्शकहरुका कारण कत्तिको दु:ख पाउनुभएको छ?
उहाँहरुको कारण दु:ख भन्ने हुँदैन। धेरैजसो फ्यानहरु फोटो खिच्न आउनुहुन्छ। कसैको चित्त नदुखोस् भनेर सकेसम्म म फोटो खिचिरहेकी हुन्छु। तर, कोही कोही भने पटक पटक फोटो खिच्न आएर हैरान गर्नुहुन्छ। कतिपयले त च्याप्पै अँगालो हालेर फोटो खिच्न खोज्नुहुन्छ। त्यस्तोमा असहज फिल हुन्छ। त्यतिखेर चाँहि म हात हटाइदिन्छु। यसरी हुन्न यसरी खिँचौं है भन्छु। 

तपाईं नेपाल र विदेशमध्ये कताको कार्यक्रममा बढी रमाइलो मान्नुहुन्छ?
सबैतिर नेपाली अडियन्सनै हो, मलाई सबैतिर रमाइलो नै लाग्छ। त्यही फरक हो नेपालमा हजारौँ हजारौँ अडियन्ससामु प्रस्तुति दिनुपर्छ। विदेशमा भने सिमित मात्रै हुनुहुन्छ। विदेशमा भएपनि उहाँहरुको लोक संगीतप्रतिको मोह निकै हुन्छ। त्यो हिसाबले नेपाल र विदेशको दाज्न मिल्दैन। सबैतिर गीतसंगीतलाई एकैखाले माया गर्नुहुन्छ। 

तपाईंलाई कार्यक्रमको लागि थुप्रै आयोजकबाट अफर आइरहेको हुन्छ। कार्यक्रम कसरी छनोट गर्नुहुन्छ?
कार्यक्रमको अफर त धेरै आइरहेको हुन्छ। तर, आयोजक कस्तो हो भनेर एकचोटि बुझ्छु। प्रोगाम गर्दा सबै त पहिलेदेखि चिनेको भन्ने हुँदैन। सुरुमा त जो पनि नयाँ भइहाल्छ। तर, एकचोटि भने के कस्तो हो भनेर बुझ्छु। 

यत्तिका कार्यक्रममा जानुहुन्छ, कमाइ पनि राम्रै हुन्छ होला है?
हाँस्दै, अहिले त सिजन हो। राम्रै कमाइ हुन्छ।