ad ad

कला


बबी देवलको ५२ वर्षे यात्रा : डीजे, रक्सीको लतदेखि ब्रेकअपसम्म

बबी देवलको ५२ वर्षे यात्रा : डीजे, रक्सीको लतदेखि ब्रेकअपसम्म

नेपालखबर
माघ १३, २०७९ शुक्रबार १५:२०, काठमाडौँ

बलिउड अभिनेता बबी देओल आज ५२ वर्षका भएका छन्। बबीले सन् १९९५ मा फिल्म ‘बरसात’बाट बलिउडमा प्रवेश गरेका थिए। बादलको भूमिका निर्वाह गर्दै बबीले पहिलो फिल्मबाटै देशव्यापी पहिचान बनाए र फिल्मफेयर बेस्ट डेब्यु अवार्ड पाए। 

करियरको शुरुवातमा उत्कृष्ट फिल्ममा देखिएका अभिनेताले केही समयपछि साइड रोल पाउन थालेका थिए। राम्रो अफर नआएपछि बबी निकै चिन्तित हुन थाले र रक्सीको लतमा परे। बच्चाहरूको लागि चिन्तित, बबीले आफ्नो खराब लतबाट छुटकारा लागि निक्कै मेहनत गरे र सफल पनि भए। त्यसपछि ‘रेस ३’बाट बलियो पुनरागमन गरे। 

बबी देओलको जन्म २७ जनवरी १९६९ मा धर्मेन्द्र र प्रकाश कौरको घरमा भएको थियो। फिल्मी परिवारमा जन्मेका बबी सधैँ हिरो बन्न चाहन्थे। उनको झुकाव देखेर बुबाले उनलाई आफ्नो फिल्म ‘धरम–वीर’मा काम दिए। बबी त्यतिबेला मात्र १० वर्षको थिए।

बबी त्यतिबेला अभिनय गर्न चाहँदैनथे, तर धर्मेन्द्रले उनलाई फिल्ममा आफ्नो बाल्यकालको भूमिका निभाउनको लागि बच्चा चाहिने भएकोले मनाए। बिग बोसमा पुगेका बेला धर्मेन्द्रले यो फिल्मसँगको रमाईलो किस्सा सुनाउँदै भनेका थिए, ‘सुटिङको समयमा बबी अन्डरवियर नलगाई सेटमा पुगेका थिए।’ 

पढाइका लागि बाबु र दाजुको थप्पड
बबी देओलले एक अन्तवार्तामा भनेका थिए कि बाल्यकालमा उनलाई उनका दाजु सन्नी देओलले धेरै पिट्ने गर्थे। एक दिन जब बबीको शिक्षकले सन्नीसँग उनको बारेमा गुनासो गरे, सन्नीले उनलाई धेरै कुटपिट गरे। सन्नी बाहेक बबीलाई उनका बुवा धर्मेन्द्रले पनि पढाइका कारण थप्पड हानेका छन्।

बबीलाई बहिनी भनेर जिस्काउने गर्थे
बबी देओलको आवाज बाल्यकालमा निकै पातलो थियो। घरमा फोन आउँदा सानो बबीले फोन उठाउँथे। कुरा गर्ने व्यक्तिलाई कुनै महिलाले फोन उठायो जस्तो लाग्थ्यो, यसरी मानिसहरूले उनलाई बहिनी भनेर बोलाउने गर्थे। यो देखेर अन्य बालबालिकाले पनि बबीलाई जिस्काउन थाले। 

पहिलो फिल्मको सुटिङमा खुट्टा भाँचिएको थियो
बबी देओल फिल्म ‘बरसात’को पहिलो दृश्यमा दुर्घटनामा परेका थिए। घोडामा सवार बबी अर्को घोडासँग ठोक्किएपछि उनको खुट्टा भाँचियो। यो दुर्घटनापछि उनलाई तत्काल शल्यक्रियाका लागि स्कटल्याण्डबाट लण्डन लगिएको थियो। खुट्टा भाँचिएका कारण बबी आफ्नो पहिलो फिल्मको प्रमोशन कार्यक्रममा उपस्थित हुन सकेनन्।

बबीले ‘बरसात’बाट नायकको रूपमा डेब्यू गरेका थिए। पहिलो फिल्म हिट भयो र बबीको हातमा गुप्ता, सोल्जर, दिल्लगी जस्ता ठूला फिल्म आए।

बबी अभिनेता बन्नु अघि डीजे थिए
बबी देओल फिल्म उद्योगमा आउनुअघि डीजे थिए। उनले लामो समय डीजेको रुपमा काम गरेका छन्। तर केही समस्याका कारण उनले त्यो जागिर छोडेर अभिनयमा करियर बनाउने निर्णय गरे।

धर्मेन्द्रका कारण टुट्यो प्रेम सम्बन्ध
बबी र नीलम कोठारी प्रेममा थिए। उनीहरुको भेट सन्नी देओलको फिल्मको सेटमा भएको थियो। बिस्तारै मित्रता बढ्दै गयो र मित्रतालाई मायामा परिणत गर्न समय लागेन। दुवै आफ्नो चार वर्ष पुरानो सम्बन्धलाई नाम दिन चाहन्थे। तर बुबा धर्मेन्द्रले यो सम्बन्धलाई स्वीकार गरेनन्। धर्मेन्द्र कुनै बलिउड अभिनेत्री आफ्नो बुहारी बनोस् भन्ने चाहँदैनथे। धर्मेन्द्रकै कारण बबीले नीलम कोठारीसँग ब्रेकअप गरेका थिए।

तान्या आहुजासँग प्रेम विवाह
बबी देओलले १९९६ मा तान्या आहुजासँग विवाह गरेका थिए। बबी र तान्याले मुम्बईको एक क्याफेमा एक अर्कालाई भेटेका थिए र केही समयपछि दुवैले विवाह गरेका थिए। तान्या आहुजा कस्ट्युम डिजाइनर हुन्।

सन् २००० देखि बबी देओलको फिल्म लगातार फ्लप हुन थाले। जसमा ‘अब तुम्हारे हवाले वतन साथी, चोर मचाए शोर, किस्मत, बर्दष्ट, जुर्म, दोस्ती, अलग, शकलाका बुम बूम’ लगायतका फिल्म पर्छन्। सन् २०१३ सम्म उनले काम पाएनन्। होम प्रोडक्सनको फिल्म ‘यमला पगला दीवाना २’पछि उनले फिल्म पाएनन्।

फिल्ममा राम्रो अफर आउन छाडेपछि उनी तनावमा परे। त्यहि बेला उनले धेरै रक्सी पिउन थाले। एक पुरानो अन्तर्वार्ताका क्रममा उनले भनेका थिए, ‘मैले यति धेरै पिउन थालेँ कि म आफैंमा दुःख लाग्न थाल्यो। मलाई लाग्थ्यो ममा के कमी छ कि मान्छे मसँग काम गर्न चाहँदैनन्। रक्सीको सहारा लिएर सबैबाट टाढा भएँ।’

हफिङ्टन पोस्टलाई दिएको अन्तर्वार्तामा उनले भनेका छन्, ‘मैले नराम्रो समयमा आफ्ना छोराछोरीको अनुहार देखेँ र उनीहरुले मेरो बारेमा के सोच्लान् भन्ने सोचेको थिएँ। आमा र श्रीमतीको आँखामा पनि त्यही देखेँ। म आफैँलाई मार्दैछु भन्ने थाहा पाएपछि म आफैंलाई सराप्न थालेँ। किन म आफैँबाट टाढा हुन खोज्दै छु? मैले केही गर्ने हो भने आफैँले काम गर्नुपर्छ भन्ने बुझेको छु। र त्यसपछि मैले आफै काम गरेँ र पुनरागमन गर्ने निर्णय गरे।’

रेस ३ बाट पुनरागमन
उनले २०१८ को फिल्म रेस ३ बाट बलियो पुनरागमन गरे। सलमान खानसँग काम गरेपछि यो फिल्म उनको लागि ठूलो ब्रेक साबित भयो र उनले बलिउडमा पुनः पहिचान पाए।

आफ्नो एक अन्र्तवार्तामा उनले भनेका थिए, ‘मलाई थाहा थियो कि यदि मैले सलमान खानको फिल्ममा काम गरेँ भने यो देशका जनताले मलाई चिन्नेछन्। मेरो भूमिका पनि देख्नेछन्। त्यसपछि मैले अक्षय कुमारसँग ‘हाउसफुल ४’मा काम गर्ने अवसर पाएँ। रेस ३ पछि मलाई धेरै राम्रो रोलको अफर आउन सुरु भयो।’

बबीले सन् २०२० मा नेटफ्लिक्स फिल्म क्लास अफ ८३ बाट आफ्नो ओटीटी डेब्यू गरेका थिए।  यसपछि उनले एमएक्स प्लेयरको सिरिज आश्रम पाए। बबीले आश्रम र आश्रम २ मा बाबाको भूमिका निभाएकाले धेरै प्रशंसा पाएका थिए। अहिले बबी एउटा फिल्मका लागि २ देखि ४ करोडसम्म पारिश्रमिक लिन्छन्। 

बबी देओलको कुल सम्पत्ति करिब ५० करोड रहेको बताइन्छ। उनको वार्षिक कमाई करिब आठ करोड रुपैयाँ छ। बबीकी श्रीमती तान्याको ‘द गुड अर्थ’ नामक आफ्नै फर्निचर र घर सजावटको व्यवसाय छ। धेरै बलिउड स्टार र व्यवसायी उनका ग्राहक हुन्।

यसबाहेक बबीको मुम्बईमा दुईवटा चाइनिज रेष्टुरेन्ट छन्। बबीको मुम्बईको जुहुमा ८ करोड भारुको आलिशान घर छ। यसबाहेक उनको पञ्जाबमा फार्म हाउस पनि छ।

बबीलाई लक्जरी कार र बाइक मनपर्छ। उनीसँग ल्यान्ड रोभर, फ्रिल्यान्डर २, रेन्ज रोभर भोग, मर्सिडिज बेन्ज एस–क्लास र पोर्शे केयन जस्ता लक्जरी कारहरू छन्।

प्रतिक्रिया

नेपाल खबर प्रा.लि
सूचना विभाग दर्ता नंः ५४९/०७४-७५

Nepal Khabar Pvt. Ltd.

Blue Star Complex
Thapathali-11, Kathmandu, Nepal
+977 01 5340505 / 5341389
Admin:[email protected]
News:[email protected]

विज्ञापनका लागि सम्पर्क


+977 9851081116
[email protected]
Copyright © 2021 Nepalkhabar. All Rights Reserved. Designed byCurves n' Colors. Powered by .