युनिकोड
युक्रेनले अजोभ सागर र रुसले कब्जा गरेको युक्रेनी तटरेखानजिकै अवैध सामान बोकेका पाँच जहाजमा हमला गरिएको दाबी गरेको छ।
युक्रेनको ड्रोन सेनाका कमान्डर रोबर्ट ब्रोभ्डीले ती जहाज युक्रेनी अन्नको चोरी तथा सैन्य उपकरण र इन्धन ढुवानीमा संलग्न रहेको आरोप लगाएका छन्।
युक्रेनका राष्ट्रपति भोलोदिमिर जेलेन्स्कीले युद्ध अन्त्य गर्न रुसका राष्ट्रपति भ्लादिमिर पुटिनसँग आमनेसामने वार्ताको प्रस्ताव गरेको एक दिनपछि यो आक्रमण भएको हो।
यद्यपि पुटिनले सेन्ट पिटर्सबर्गमा आर्थिक मञ्चको बैठकमा यो प्रस्ताव अस्वीकार गरे।
यसैबिच युक्रेनले शुक्रबार रोमानियाको तटमा आफ्नो एउटा नौसेना ड्रोन विस्फोट भएको पुष्टि गरेको छ।घटनामा कुनै पनि घाइते भएको रिपोर्ट गरिएको छैन।
यसैबिच अजरबैजानको विदेश मन्त्रालयले अजोभ सागरमा दुई जहाजमा भएको आक्रमणमा आफ्ना पाँच नागरिकको मृत्यु भएको पुष्टि गरेको छ।
मन्त्रालयले आक्रमणका लागि कुनै पनि पक्षलाई दोष दिएको छैन र संलग्न जहाजहरू अजरबैजानको नभएको बताएको छ।
यसअघि युक्रेनको ड्रोन फोर्सका कमान्डर ब्रोभ्डीले मारिउपोल र बर्दियान्स्क बन्दरगाह साथै युक्रेनले 'अस्थायी रूपमा कब्जा गरिएका क्षेत्र' भनिने तटीय क्षेत्रमा राति पाँच जहाजलाई निसाना बनाइएको बताएका थिए। जुन क्षेत्र युक्रेनको हो र हाल रुसको नियन्त्रणमा छ।
उनका अनुसार, युक्रेनका अन्न चोरी र सैन्य उपकरण र इन्धनको गोप्य ढुवानी सहज बनाउन कार्गो जहाज र ट्याङ्करसहित ती जहाजहरूको नाम मेटाइएको थियो र तिनका रडार बन्द गरिएको थियो।
अजरबैजानको विदेश मन्त्रालयले ती जहाजको नाम 'नोस्ट्रा' र 'सिर्कोन' भएको बताएको छ।
युक्रेनका स्थानीय अधिकारीहरूका अनुसार, गत दिनमा युक्रेनमा कम्तीमा १३ जनाको मृत्यु भएको छ र ७० भन्दा बढी घाइते भएका छन्।
प्रतिक्रिया