युनिकोड
चलचित्र क्षेत्रमा क्रियाशील नयाँ पुस्ताका चलचित्रकर्मीहरूलाई चलचित्र निर्माणबारे सैद्धान्तिक एवं व्यावहारिक ज्ञान, सीप तथा नयाँ प्रविधि र शैलीबारे प्रशिक्षण दिन दाङमा लुम्बिनी प्रदेशस्तरीय चलचित्र निर्माण कार्यशाला हुने भएको छ।
पहल नेपालको आयोजना र चलचित्र विकास बोर्डको सहयोगमा आगामी पुस २३ गतेदेखि २७ गतेसम्म सञ्चालन हुने प्रशिक्षण कार्यक्रममा निर्देशक एवं अभिनेता अनुप बराल, निर्देशक एवं लेखक दीपेन्द्र लामा र छायाकार पुरुषोत्तम प्रधान प्रशिक्षक रहनेछन्।
पाँच दिनसम्म चल्ने कार्याशालामा पटकथा लेखन, निर्देशन, छायांकन र अभिनय विधामा प्रशिक्षण दिइने पहल नेपालका अध्यक्ष केएल पीडितले जानकारी दिए।
‘मोफसलमा रहेका चलचित्रकर्मीहरूलाई चलचित्र निर्माणको राष्ट्रिय मूलधारमा जोड्न र मौलिक एवं सार्थक चलचित्र निर्माणको वातावरण बनाउन यो कार्यशाला निकै महत्त्वपूर्ण हुने विश्वास लिएको छु’, चलचित्र विकास बोर्डका अध्यक्ष दयाराम दहालले भने।
प्रतिक्रिया