युनिकोड
नेपालको धितोपत्र बजारमा हाल देखा परेका समस्या र लगानीकर्ताको गुनासो प्रति नेपाल धितोपत्र बोर्डले गम्भीर ध्यानाकर्षण भएको जनाएको छ।
बोर्डका प्रवक्ता निरञ्जय घिमिरेले बजारमा देखिएका समस्याहरूको समाधान र लगानीकर्ताको हकहित संरक्षणका लागि बोर्डले गम्भीर रूपमा गृहकार्य गरिरहेको बताएका हुन्।
आगामी सातासम्ममा समयबद्ध कार्ययोजनासहित विस्तृत रुपमा पुँजी बजार विकास मार्गचित्र सार्वजनिक गरी तत्कालै कार्यान्वयनमा लगिने उनको भनाइ छ।
बोर्डबाट अनुमतिपत्र प्राप्त धितोपत्र व्यवसायीलगायत सम्बद्ध संस्थाहरूलाई बोर्डबाट मार्जिन कारोबारको प्रभावकारी कार्यान्वयन लगायत बजार सम्बन्धी विषयहरूका सम्बन्धमा दिइएका निर्देशन अनुरूपका कामकारवाहीहरू तोकिएको समयमा सम्पादन गराउने बोर्डको भनाइ छ।
त्यस्तै थप स्वस्थ, सुरक्षित एवम् प्रभावकारी पुँजी बजारको वातावरण बनाउँदै धितोपत्रको सार्वजनिक निष्काशन प्रक्रिया र नियमन व्यवस्थालाई अझ व्यवस्थित गर्न विद्यमान धितोपत्र सम्बन्धी ऐन, धितोपत्र दर्ता तथा निष्काशन नियमावली, लगायतका अन्य नियमावलीहरू तथा सूचीकृत सङ्गठित संस्थाहरूको संस्थागत सुशासन सम्बन्धी निर्देशिका लगायत अन्य कानुनी व्यवस्थाहरूमा समसामयिक पुनरवलोकन गर्ने कार्य प्रारम्भ भइसकेको प्रवक्ता घिमिरेको दाबी छ।
‘अतः लगानीकर्ताको हित संरक्षणलाई उच्च महत्व दिई बोर्डले कार्य अगाडि बढाई रहेकोले कसैको पनि हल्ला, वहकाउ तथा अफवाहमा नपरी आफ्नो अध्ययन, विश्लेषणमा आधारित रही जोखिम वहन क्षमता समेतलाई ध्यान दिई सुझबुझ पूर्वक लगानी सम्बन्धी निर्णय लिन अनुरोध गरिन्छ’, बोर्डले भनेको छ।
प्रतिक्रिया