बजेट कार्यान्वयनमा सहरी विकासको वित्तीय प्रगति ५८ प्रतिशत, गत वर्ष के के गर्‍यो?

सहरी विकास मन्त्रालयले गत आर्थिक वर्ष २०८१/८२ मा  बजेटमा उल्लिखित कार्यक्रम कार्यान्वयनमा वित्तीयतर्फ ५८ दशमलव छ प्रतिशत प्रगति हासिल गरेको छ।
 
मन्त्रालयद्वारा आज यहाँ आयोजित पत्रकार सम्मेलनमा प्रवक्ता नारायणप्रसाद मैनालीले मन्त्रालयले एक वर्षको अवधिमा सहरी विकास मन्त्रालयबाट नीतिगत, कानुनी, संस्थागत सुधार तथा पूर्वाधार क्षेत्रमा भएका प्रमुख कार्यहरूबारे जानकारी दिए।

प्रवक्ता मैनालीका अनुसार सो आवमा मन्त्रालयलाई ६८ अर्ब १४ करोड ३६लाख ६८ हजार १२३ बजेट विनियोजित भएकोमा वित्तीय प्रगति ३९ अर्ब ५६ करोड, ५२ लाख ७० हजार खर्च भएको छ।
 
सो अवधिमा ९७, स्वास्थ्य भवन, पाँच सभाहल, २१ सरकारी कार्यालय, ५५  स्थानीय तहको प्रशासकीय भवन, ९७  विद्यालय भवन, ३२ पार्क, १३ बसपार्क, ५७ सार्वजनिक भवन, दुई दशमलव नौ किमी तटबन्ध, २२ वटा स्थानीय सडक पुल, २९६ किमी नाला, २७८ वटा झोलुङ्गे पुलको निर्माण सम्पन्न भएका छन्।