वैदेशिक रोजगारीको कहरः मलेसिया पुगेको दुई महिनामै मृत्यु

वैदेशिक रोजगारीका क्रममा मलेसिया पुगेको दुई महिनामै पाल्पा निस्दी गाउँपालिका–६ अर्चलेका यमबहादुर बयम्बुको मृत्यु भएको छ।

अन्दाजी ४२ वर्षीय बयम्बुको यही कात्तिक २६ गते साँझ मलेसियामा मृत्यु भएको उनका आफन्त होम राई मगरले जानकारी दिए। काठमाडौँस्थित रिजा ओभरसिसमार्फत मलेसियाको जेराई सेक्युरिटी सर्भिसेस कम्पनीमा काम गर्न बयम्बु मलेसिया दुई महिनाअघि मात्रै पुगेका थिए ।

मलेसिया पुगेदेखि नै बिरामी बयम्बुको उपचारमा म्यानपावर र कम्पनीले समयमा नै चासो नदेखाउँदा ज्यान गएको मृतककी बहिनी कान्तिसरा बयम्बुले बताइन्। बयम्बुको उपचारका लागि परिवारबाट एक लाख २० हजार रकम पठाएको तर समयमा नै म्यानपावर र कम्पनीले उपचारमा ध्यान नदिएको कान्तिसराले गुनासो गरिन्।

काठमाडौंको रिजा ओभरसिसकी सञ्चालक पुनम श्रेष्ठले आफूले उपचारका लागि पहल गरे पनि सम्भव नभएको दाबी गरिन्। पारिवारको लालनपालन, घरायसी गुजारा चलाउन रोजगारीका निम्ति मिठो सपना बोकेर बयम्बु मलेसिया पुगेका थिए। उनको परिवारमा बुबाआमा, श्रीमती, दुई छोरा र एक छोरी छन्। रासस