विवाहेतर सम्बन्धको शंकापछि हत्या,  ‘हरियो साडी’ ले खोल्यो रहस्य

एक अर्काप्रतिको शंका र पारिवारिक कलहले कस्तो भयानक रूप लिन सक्छ भन्ने एउटा ह्दयविद्वारक उदाहरण विराटनगर महानगरपालिका वडा नम्बर १५ को घटनाले सबैलाई त्रसित बनाएको छ। 

चैत ५ गतेको मध्यरात, जब संसार निदाएको थियो। ३२ वर्षीय कोमल कुमारी साहको आफ्नै घरको ओछ्यानमा बीभत्स हत्या भयो। हत्यारा अरू कोही नभएर उनकै श्रीमान् ३५ वर्षीय रोशन साह थिए। रोशनले कोमलकै साडी र गलबन्दी प्रयोग गरी घाँटी कसेर उनको प्राण लिएको प्रहरी समक्ष स्वीकार गरेका छन्।

साहले श्रीमतीको विवाहेतर सम्बन्ध रहेको आशंकामा हत्या गरेको अनुमान गरिएको छ। श्रीमतीले अन्य व्यक्तिसँग टिकटक बनाउने तथा फोटो खिच्ने गरेको देखेपछि श्रीमतीमाथि साहले शंका गरेको बताइएको छ। यद्यपी बुधवार जिल्ला प्रहरी कार्यालय मोरङले पत्रकार सम्मेलन गरी हत्याको कारण खुलाएन।

घटनाबारेमा  जानकारी दिँदै प्रहरीले यसलाई फिल्मी शैलीको हत्याको संज्ञा दिएको छ। हत्या गरेपछि अपराध लुकाउन रोशनले गरेको योजनाबद्ध प्रयास र हत्या विवरणले यस्तो देखाएको प्रहरीले जनाएको छ। 
जिल्ला प्रहरी कार्यालय मोरङका  डिएसपी लीलाराज लामिछानेका अनुसार, चैत ६ गतेको झिसमिसे बिहान, करिब १२ बजेतिर उनले कोमलको शवलाई हातखुट्टा बाँधेर तन्नामा पोको पारे। त्यसपछि उक्त शवलाई प्रदेश १–०२–००३ ह ५७०७ नम्बरको सिटी सफारीमा राखेर घरबाट करिब ४ किलोमिटर पूर्व विराटनगर–१७ स्थित छाला फ्याक्ट्री नजिकैको एउटा कल्भर्ट मुनि फालिदिए।