घर बनाउन लाग्नुभएको छ? विराटनगरमा हुने प्रर्दशनी उपयोगी हुनसक्छ

घर निर्माण सम्पन्न भएपछि छत चुहिने समस्या, भित्तामा ओस (सिपेज) आउने वा किराको प्रकोपले आजित हुनुहुन्छ? चैत १२ गतेदेखि १६ गतेसम्म विराटनगर आउनुहोस तँपाईको समस्या समाधान हुनसक्छ।

उद्योग सङ्गठन मोरङले विराटनगरको जैन भवनमा गर्न लागेको  ‘सिआईएम होम बिल्ड एक्स्पो २०२६’ (घर निर्माण प्रर्दशनी–२०८२) मा पाईने जानकारीले तपाईँको समस्या समाधान हुनसक्छ। संगठनले चैत १२ देखि १६ सम्म यो प्रर्दशनी गर्न लागेको हो। 

प्रदर्शनी आयोजकहरूका अनुसार घरधनीका यस्ता व्यवहारिक र प्राविधिक उल्झन सुल्झाउन यो प्रदर्शनी गर्न लागिएको हो ।  यस प्रदर्शनीले यस्ता साझा तर जटिल समस्याहरूको दीर्घकालीन समाधानका लागि वाटरप्रुफिङ, आधुनिक इन्सुलेसन र पेस्ट कन्ट्रोल प्रविधिमा आबद्ध विशेषज्ञहरूसँग प्रत्यक्ष परामर्श गर्ने र उपयुक्त सामग्री छनोट गर्ने अवसर प्रदान गर्ने सङ्गठनका अध्यक्ष नन्द किशोर राठीले जानकारी दिए। 

यस पटक  निर्माण सामग्रीको प्रदर्शनीमा मात्र सीमित नभई घर निर्माणका क्रममा आइपर्ने विविध प्राविधिक समस्याहरूको समाधान खोज्ने मुख्य थलो बन्ने भएको छ। बिहिबार आयोजित पत्रकार सम्मेलनमा उनले बताए अनुसार, विशेष गरी प्रदर्शनीको अन्तिम दिन चैत १६ गते घरको मर्मत सम्भार, छत चुहिने समस्याको स्थायी समाधान र पुराना भवनहरूको सुदृढीकरण (रेट्रोफिटिङ) का विषयमा केन्द्रित विशेष सत्रहरू नै सञ्चालन गरिनेछन्।