आर्मीको अपराजित यात्रा कायमै, मधेसको पहिलो हार

त्रिभुवन आर्मी क्लबले प्रधानमन्त्री कप एक दिवसीय राष्ट्रिय क्रिकेट प्रतियोगितामा अपराजित यात्रालाई कायम राख्दा मधेस प्रदेशले भने पहिलो हार व्यहोरेको छ। 

बिहीबार भएको खेलमा मधेस त्रिभुवन आर्मीसँग ६ विकेटले पराजित हुँदा अपराजित यात्रामा पूर्णविराम लागेको हो। 

पीएम कपमा पहिलो हार भोगेको मधेस ३ खेलमा जित र एक खेलमा अंक बाँड्दै ७ अंकमा तालिकाको चौथो स्थानमा रहेको छ। 

मधेसलाई हराएसँगै पीएम कपमा अब आर्मी मात्र अपराजित टोली हो। चार खेलमा जित र एक खेलमा अंक बाँडेको आर्मी ९ अंकमा तालिकाको शीर्ष स्थानमा छ। 

मधेसले दिएको १ सय ८५ रनको लक्ष्य आर्मीले २९.२ ओभरमा ४ विकेटको क्षतिमा भेट्टायो। 

आर्मीको जितमा ओपनर तृतराज दासले सर्वाधिक ६९ रनको योगदान दिए। उनले ७२ बलमा ७ चौका र ३ छक्का प्रहार गरे। बसिर अहमद ४१ र अर्जुन साउद १ रनमा अविजित रहे। कप्तान विनोद भण्डारी ३२। कुशल मल्ल २४ र भिम सार्की ८ रनमा पेभेलियन फर्के। 

मधेसका मोहम्मद आदिल आलमले २ तथा पवन सर्राफ र विशाल सुस्लिङले समान एक विकेट लिए। 

त्यसअघि जनकपुरको रामजानकी बहुउदेश्यिय स्टेडियममा आर्मीले टस जितेर फिल्डिङ रोजेपछि ब्याटिङ गरेको मधेश ४८.३ ओभरमा १ सय ८४ रन बनाउँदा अलआउट भयो। 

मधेसका लागि विशाल सुस्लिङले अर्धशतक पूरा गरे। उनले ७३ बलमा ३ चौका र २ छक्का सहयोगमा ५१ रन बनाए। अनिल शाहले ४२ रन थपे। पवन सर्राफले २२, विशाल पटेलले १६ रन थपे। 

मधेसलाई रोक्न बसिर अहमदले ३ विकेट लिए। साहब आलम र नरेन साउदले समान २ विकेट लिए। आकाश चन्द, कुशल मल्ल र पवन कार्कीले समान एक विकेट लिए।