युनिकोड
त्रिभुवन आर्मी फुटबल क्लबले सहिद स्मारक एन्फा महिला लिगमा सानदार सुरुवात गरेको छ।
बुधबार भएको दोस्रो खेलमा आर्मीले झापा एफसीमाथि ५-० गोल अन्तरको फराकिलो जित दर्ता गरेको हो। आर्मीले सबै गोल दोस्रो हाफमा गरेको थियो।
आर्मीको जितमा अञ्जना थुलुङ राइले दुई तथा दिपा शाही, हिमा चौधरी र तुलसा बोहोराले एक-एक गोल गरे। दिपा शाहीले खेलको ५७औँ मिनेटमा गोल गरिन्। हिमा चौधरीले ६८औँ मिनेटमा गोल गर्दै आर्मीको अग्रता दोब्बर पारिन्।
अञ्जनाले खेलको ८६औँ मिनेटमा गोल गर्दै आर्मीलाई ३-० को अग्रता दिलाइन्। त्यसको चार मिनेटपछि नै खेलको अन्तिम मिनेटमा व्यक्तिगत दोस्रो गोल गरिन्। खेलको इन्ज्युरी समयमा तुलसा बोहोराले गोल गर्दै आर्मीलाई ५-० गोल अन्तरले जित दिलाइन्।
खेलको प्लेयर अफ दि म्याच दिपा शाही बनिन्। उनले ७ हजार ५ सय रुपैयाँ प्राप्त गरिन्।
यसअघि भएको उद्घाटन खेलमा संकटाले न्युरोड टिम (एनआरटी) माथि ४-० गोल अन्तरको फराकिलो जित निकालेको थियो। लिगमा बिहीबार दुई खेल हुनेछन्। पहिलो खेलमा बागमती युथ क्लब र आरएस पोखरा खेल्नेछन्। यो खेल बिहान ११ बजे सुरु हुनेछ।
त्यस्तै, दोस्रो खेलमा नेपाल पुलिस क्लब र चर्च ब्वाइज युनाइटेड भिड्नेछन्। यो खेल दिउँसो ३ बजे सुरु हुनेछ। दुवै खेल च्यासल मैदानमा हुनेछ।
प्रतिक्रिया