युनिकोड
एनसेल पाँचौँ टाइगर कप भलिबल प्रतियोगिताको पुरुषतर्फ गण्डकी प्रदेशले सशस्त्र प्रहरी बल एपीएफलाई पराजित गरेको छ। पोखरा रंगशालास्थित भलिबल कोर्टमा भएको खेलमा गण्डकीले एपिएफमाथि ३-१ सेटको जित दर्ता गराएको हो।
पहिलो सेट २३-२५ ले गुमाएको गण्डकीले दोस्रो, तेस्रो र चौथो सेटमा पुनरागमन गर्दै जित हासिल गर्न सफल रह्यो। गण्डकीले दोस्रो सेट २५-२०, तेस्रो सेट २५-१९ र चौथो सेट २५-१५ ले आफ्नो पक्षमा पार्यो। अब गण्डकी र एपीएफले टिपटप हेल्प नेपाल स्पोर्ट्स क्लबसँग खेल्नेछन्। त्यसपछि शीर्ष स्थानमा रहने टोलीले एलिमिनेटर खेल्नेछ।
यसअघि महिलातर्फ भएको खेलमा आयोजक टोली र नेपाल पुलिस क्लब विजयी भएका थिए। आयोजक टोलीले टिपटप न्यू डायमन्ड स्पोर्ट्स क्लब र पुलिसले त्रिभुवन आर्मी क्लबलाई पराजित गरेको थियो।
महिलातर्फ आयोजक टोली र एपीएफले पहिलो क्वालिफायर खेल्नेछन्। पुलिस र न्यू डायमन्डले एलिमिनेटर खेल्नेछन्। पहिलो क्वालिफायरमा पराजित हुने टोली र एलिमिनेटरमा विजयी हुने टोलीले फाइनल प्रवेशका लागि दोस्रो क्वालिफायरमा प्रतिस्पर्धा गर्नेछन्।
टाइगर ग्रुप अफ पोखरा नेपालको आयोजनामा भएको उक्त प्रतियोगिता माघ १९ गतेसम्म चल्नेछ।
प्रतिक्रिया