नेपाली टोली भारतसँग भिड्नुअघि पुरस्कार घोषणा गर्ने होडबाजी

नेपाली राष्ट्रिय क्रिकेट टोलीले एसिया कपमा आज सोमबार विश्व क्रिकेटको महारथी भारतको सामना गर्दैछ। 

श्रीलंकाको पाल्लेकेले स्टेडियमा हुने खेल दिउँसो सवा ३ बजे सुरु हुँदैछ।

भारतविरुद्धको खेल नेपाली टोलीसहित नेपालका क्रिकेट प्रेमीका लागिसमेत बहुप्रतिक्षित खेल हो। त्यसैले भारतसँगको खेलका लागि सबै उत्साहित छन्। 

भारतविरुद्धको खेलअघि नेपाली टोलीका लागि पुरस्कार घोषणा गर्नेको होडबाजी देखिएको छ।

व्यक्तिगतदेखि व्यवसायिक मात्रै होइन, नगरस्तरबाट समेत नेपाली टोलीका लागि पुरस्कार घोषणा भइरहेका छन्।

भारतविरुद्ध जित निकाले लाखौँ पुरस्कार दिनेदेखि शतक हान्ने र विकेट लिने खेलाडीका लागि पुरस्कार घोषणा गर्ने हतारमा देखिन्छन्। 

अर्ना वियरले भारतविरुद्धको प्रतिस्पर्धामा प्रत्येक छक्का प्रहार र विकेट लिने खेलाडीलाई १ लाख पुरस्कार दिने घोषणा गरेको छ।

अर्नाले भारतविरुद्ध प्रत्येक छक्का प्रहार गरेबापत र विकेट लिएबापत १ लाख तथा चौका प्रहार गर्ने खेलाडीलाई २५ हजार पुरस्कार दिने घोषणा गरेको हो। खेलाडीलाई प्रोत्साहन गर्ने उद्देश्यले यस्तो घोषणा गरेका अर्ना वियरले जनाएको छ।

उता कञ्चनपुरको शुक्लाफाँटा नगरपालिकाले पनि नेपाली खेलाडीका लागि पुरस्कार घोषणा गरेको छ। 

नेपाली राष्ट्रिय क्रिकेट टिमको हौसला बढाउने उद्देश्यले शुक्लाफाँटा भारतविरुद्धको खेलमा १०० रन (सतक) प्रहार गर्ने र ४ विकेट लिने नेपाली खेलाडीलाई जनही १/१ लाख रुपैयाँसहित सम्मान गरिने जनाएको छ। 

उता क्रिकेटरलाई यसअघि दिने भनिएको पुरस्कार नै सरकारले अझैसम्म दिन सकेको छैन। 

यसैलाई लिएर राष्ट्रिय प्रजातन्त्र पार्टीका प्रवक्ता ज्ञानबहादुर शाहीले सोमबार सरकारले दिने भनेर घोषणा गरेको पुरस्कार रकम खेलाडीले नपाएकोमा संसद्‍बाट ध्यानाकर्षण गराए।

प्रतिनिधि सभा बैठकमा विशेष समय माग गर्दै सांसद शाहीले नेपाल नामिबिया र स्कटल्याण्ड सम्मिलित खेलमा विजेता बन्दा तीन लाख, नेपाल, यूएई र पपुवान्यूगिनीबीचको खेलमा विजेता बन्दा तीन लाख, प्रधानमन्त्रीले राष्ट्रका तर्फबाट घोाषणा गरेको दुई लाख, एसीसी कप जित्दा जनही ६ लाखलगायत विभिन्न खेलमा विजेता बन्दा घोषणा गरेको जनही १४ लाख पुरस्कार अझै नदिएको भन्दै आपत्ति जनाए।

हालसम्म उक्त पुरस्कार रकम खेलाडीले नपाएपछि शाहीले सरकारको ध्यानाकर्षण गराए। खेलाडीको पीडा संसद्‍बाटै कवितामार्फत उनले सुनाएका हुन्। 

जब देख्छु, जब सुन्छु सरकारका वाचा मनै हर्षित हुन्छ
जब क्रिकेट मैदानमा छिर्छु, रगत पसिना बगाउँछौ ।
जब भोक लाग्छ,छाम्छौं गोजि रित्तो देख्दा हजारपटक त्रसित हुन्छु।
गरेथ्यौँ वाचा किन जब निर्वाह गर्न सक्दैनौँ भने,
देखायौं किन आशा जब पुरा गर्न सक्दैनौँ भने।
तिम्रा मिठा र चिल्ला बाचामा हामी भुलेका थियौँ,
भोको र नांगो पेटमा हामी क्रिकेट खेलेका थिथौँ।

‘क्रिकेट खेलाडीलाई दिने भनिएको पैसा किन रोकेर राखिएको छ? पैसा छिटो दिऊँ,’ उनले भने, ‘भोको पेटले राष्ट्रवादलाई कति धान्ने? प्रधानमन्त्री, खेलकुदमन्त्री र सचिवलायले छिटो उक्त पुरस्कार उपलब्ध गराओस्।’

एसिया कपअन्तर्गत समूह चरणको पहिलो खेलमा पाकिस्तानसँग २ सय ३८ रनको फराकिलो अन्तरको हार व्यहोरेको नेपाली टोली भारतविरुद्ध सुधारिएको प्रर्दशन गर्ने योजनामा हुनेछ। 

उता वर्षाका कारण खेल रद्द भएपछि पाकिस्तानसँग अंक बाँडेको भारतीय टोली जित्नै पर्ने दबाबमा मैदान उत्रिँदैछ। 

पाकिस्तानसँग खेलको पहिलो इनिङस् भए पनि वर्षाका कारण दोस्रो इनिङस् हुन नसकेपछि खेल रद्द भएको थियो।

आजको खेल पनि वर्षाका कारण प्रभावित भएर अंक बाँड्ने अवस्था आए भारत दुई अंकसहित सुपर फोरमा पुग्नेछ। 

यता नेपाललाई सुपर फोरमा पुग्न भारतविरुद्ध जित्नैपर्ने दबाब छ। आजको खेलमा अंक बाँड्ने अवस्था आए नेपाल समूह चरणबाटै बाहिरिने छ।