युनिकोड
इंगल्याण्डले अन्तर्राष्ट्रिय एकदिवसीय क्रिकेटको एकै इनिङमा सर्वाधिक रन बनाउने कीर्तिमान बनाएको छ। नेदरल्याण्ड्सविरुद्धको शुक्रबार भएको खेलमा इंगल्याण्डले ४९८ रन बनाउँदै इतिहासकै सर्वाधिक ठूलो योगफल बनाएको हो ।
भिआर क्रिकेट ग्राउन्डमा टस हारेर ब्याटिङको निम्तो पाएको इंगल्याण्डले निर्धारित ५० ओभरमा ४ विकेट गुमाउँदै ४९८ रन बनायो । यसअघि ओडिआईमा सर्वाधिक ठूलो इनिङ २०१८ मा इंगल्याण्डले अष्ट्रेलियाविरुद्ध ६ विकेट गुमाउँदै ४८१ रन बनाएको थियो । उसले आफ्नो रेकर्ड तोडेको हो ।
इंगल्याण्डका जोस बटलरले ७० बलमा ७ चौका र १४ छक्कासहित सर्वाधिक १६२ रनको अविजित विष्फोटक शतकीय इनिङ खेले । उनको यो ओडिआई करिअरको सर्वाधिक उच्च प्रदर्शन हो । युवा ब्याटर फिलिप साल्टले ९३ बलमा १४ चौका र ३ छक्कासहित १२२ रनको शतकीय इनिङ खेले ।
उनको यो पहिलो अन्तर्राष्ट्रिय शतक हो । डेविड मलानले १०९ बलमा ९ चौका र ३ छक्कासहित १२५ रनको शतकीय इनिङ खेले । मलानको यो ओडिआई करिअरको पहिलो शतक हो । मलान जस बटलरपछि तीनै फरम्याटमा शतक प्रहार गर्ने इंगल्याण्डका दोस्रो पुरुष खेलाडी बनेका छन् ।
दोस्रो विकेटका लागि मलान र साल्टले २२२ रनको दोहोरो शतकीय साझेदारी गरेका थिए ।
तल्लोक्रमका लियाम लिभिङस्टोनले २२ बलमा ६ चौका र ६ छक्कासहित ६६ रनमा अविजित रहे । तेस्रो विकेटका लागि बटलर र मलानले ९० बलमा १८४ रनको शतकीय साझेदारी गरेका थिए ।
शुक्रबारको खेलमा इंगल्याण्डका ब्याटरले २६ छक्का प्रहार गरेका थिए। एकदिवसीय क्रिकेटमा एकै इनिङमा बनेको यो सबैभन्दा धेरै छक्का हो।
शुक्रबारको खेलमा नेदरल्याण्ड्स २३२ रनले पराजित भयो ।
प्रतिक्रिया