बार्यनको जितमा लेवान्डोस्कीको दुई गोल

जर्मन बुन्डेस लिगाअन्तर्गत आइतबार राति भएको खेलमा बार्यन म्युनिखले लिगको पुछारमा रहेको ग्रौथर फर्थमाथि ४–१ गोल अन्तरको महत्वपूर्ण जित हात पारेको छ।

बार्यनलाई जित दिलाउने क्रममा बार्यनका रोबर्ट लेवान्डोस्कीले २ गोल गरे। खेलको पहिलो हाफमा १–० गोलले पछि परेको टोलीले दोस्रो हाफमा ४ गोल गरेको हो।

लेवान्डोस्कीले खेलको ४६ औं र ८२ औं मिनेटमा गोल गरेका थिए। १ गोल आत्मघाती भएको थियो भने चोउपो मोटिङले इन्ज्युरी समयमा १ गोल गर्दै अन्तर फराकिलो पारे। 

बुन्डेसलिगामा बार्यन म्युनिख २३ खेलबाट ५५ अंकका साथ शीर्ष स्थानमा छ। दोस्रो स्थानमा रहेको बी डर्टमन्डको समान खेलबाट ४९ अंक छ।