युनिकोड
समूह चरणको अन्तिम खेलमा जित निकाल्दै सुदूरपश्चिम र लुम्बिनी प्रदेशले काठमाडौमा जारी प्रधानमन्त्री टी–२० राष्ट्रिय क्रिकेट प्रतियोगितामा सुखद अन्त्य गरेका छन्।
आइतबार भएको समुह ए को खेलमा सुदूरपश्चिमले प्रदेश १ लाई ७ विकेटले पराजित गर्दै तेस्रो स्थानमा रहेर प्रतियोगिता सकाएको हो।
प्रदेश १ ले दिएको १ सय ५९ रनको लक्ष्य पछ्याएको सुदूरपश्चिमले १९ दशमलव १ ओभरमा ३ विकेट गुमाएर लक्ष्य भेट्टाएको हो।
त्यसअघि पहिले ब्याटिङ गरेको प्रदेश १ ले निर्धारित २० ओभरमा ९ विकेट गुमाएर १ सय ५८ रनको योगफल तयार पारेको थियो।
आजै भएको समूह बी को अर्को खेलमा देव खनालको विष्फोटक ब्याटिङमा लुम्बिनी प्रदेशले गण्डकी प्रदेशलाई ५ विकेटले हराउँदै चौथो स्थानमा रहेर प्रतियोगिता सकाएको हो।
गण्डकीले दिएको १ सय ५ रनको लक्ष्य लुम्बिनीले १३ दशमलव १ ओभरमा ५ विकेट गुमाउँदै भेट्टायो। लुम्बिनीका देव खनालले २६ बलमा १० चौका १ छक्का हान्दै ५६ रनको महत्वपुर्ण योगदान दिए।
त्यसअघि पहिले ब्याटिङ गरेको गण्डकी १९ दशमलव १ ओभरमा १ सय ४ रन जोड्दा अलआउट भयो। गण्डकी जित बिहिन रुपमा पुछारमा रहेर प्रतियोगिता सकाएको हो।
समूह बी बाट नेपाल एपीएफ र बागमती प्रदेशले सेमिफाइनलमा स्थान बनाइसकेका छन्।
समूह ए बाट नेपाल पुलिस क्लब त्रिभुवन आर्मी क्लबले अन्तिम ४ मा स्थान बनाइसकेका छन्। समुह चरणको अन्तिम खेलमा भोलि पुलिस क्लब र प्रदेश १ भिड्नेछन्।
यी दुई टोलीबीचको खेल शनिबारका लागि तोकिए पनि प्रदेश १ का खेलाडीमा कोरोना सक्रमण देखिएपछि स्थगित भएको थियो।
प्रतिक्रिया