कर्णाली प्रदेशले प्रधानमन्त्री कप टी–२० कप क्रिकेट प्रतियोगितामा पहिलो जित दर्ता गरेको छ। प्रदेश १ लाई ३१ रनले पराजित गर्दै कर्णाली प्रदेशले पहिलो जित निकालेको हो।
कर्णाली प्रदेशले दिएको १ सय २१ रनको लक्ष्य पछ्याएको प्रदेश १, १७ दशमलव ५ ओभरमा ८९ रनमा अलआउट भयो।
फिर्दोस अन्सारीले बनाएको २३ रन नै प्रदेश १ का लागि सर्वाधिक रह्यो। दिपेश कँडेल र श्रवण यादवले समान १५ तथा सिद्धान्त लोहनीले १४ रन बनाए।
कर्णाली प्रदेशका अनुज चुनारा एक्लैले ४ विकेट झारे। ३.५ ओभर बलिङ गरेका अनुजले मात्र १६ रन खर्चे। दिवान पुनले २ तथा दिनेश अधिकारी, प्रकाश जैसी र अनुप कुवँरले समान एक विकेट लिए।
त्यसअघि मूलपानी क्रिकेट मैदानमा प्रदेश १ ले टस जितेर फिल्डिङ रोजेपछि ब्याटिङ गरेको कर्णाली प्रदेशले निर्धारित २० ओभरमा ७ विकेट गुमाएर १ सय २० रनको योगफल तयार पारेको हो।
कप्तान रवीन्द्र शाहीले जोडेको ३६ रन नै सर्वाधिक हो। प्रकाश जैसीले २५ र राज शाहले १५, विपिन रावलले ११ रन बनाए। अन्यले दोहोरो अंकको स्कोर छुन सकेनन्।
प्रदेश १ का मुकुन्द यादवले ३, फिर्दोस अन्सारीले २ विकेट लिए। कमल खत्री र सिद्धान्त लोहनीले समान १ विकेट लिए।
Shares
प्रतिक्रिया