ए डिभिजन लिगमा आर्मीको तेस्रो जित

काठमाडौंमा जारी कतार एअरवेज सहिद स्मारक ए डिभिजन लिगमा त्रिभुवन आर्मी फुटबल क्लबले  तेस्रो जित हासिल गरेको छ। 

त्रिपुरेश्वरस्थित दशरथ रंगशालामा शनिबार भएको आठौं चरणको खेलमा आर्मीले एनआरटीलाई १–० गोलअन्तरले हराएको हो।  

पहिलो हाफमा १–० को अग्रता बनाएको आर्मीले दोस्रो हाफमा राम्रो मौका बनाए पनि गोल गर्न सकेन। 

खेलको १७औं मिनेटमा दिनेश हेम्जनले गरेको गोल नै आर्मीका लागि निर्णायक बन्यो। जगजित श्रेष्ठको क्रसमा दिनेशले बललाई पोस्टको दिशा दिएका थिए।   

आर्मीले ८ खेलमा ३ जित, ५ मा बराबरीको नतिजा बनाउँदै १४ अंक बनाएको छ। संकटा क्लबसँग समान १४ अंक भए पनि गोलअन्तरमा संकटा तेस्रो र आर्मी चौथो स्थानमा छन्।  

आर्मीसँग पराजित एनआरटी भने १० अंकमा सातौं स्थानमा यथावत् छ। एनआरटीको भने ८ खेलमा २ जित, ४ मा बराबरी र २ खेलमा हार भएको छ। जारी लिगमा एनआरटीको यो दोस्रो हार हो।