युनिकोड
इन्दु बर्माको अर्धशतक मद्दतमा नेपालले कतारलाई १४७ रनको लक्ष्य दिएको छ।
तीन खेलको टी-२० आई सिरिज अन्तर्गत मंगलबार दोहाको वेष्ट इण्ड पार्क इन्टरनेशनल क्रिकेट स्टेडियममा भएको पहिलो खेलमा नेपालले गतिलो स्कोर गरेको हो।
कतारले टस जितेर फिल्डिङ रोजेपछि ब्याटिङ गरेको नेपालले निर्धारित २० ओभरमा ३ विकेट गुमाउँदै १४६ रनको योगफल तयार पारेको हो।
नेपालका लागि कीर्तिमानी प्रदर्शन गरेकी इन्दुले सर्वाधिक ५५ रनको योगदान दिइन्। ४७ बलमा ५ चौका मद्दतमा ५५ रन जोडेकी इन्दु रिटायर्ड हर्ट हुँदै पवेलियन फर्किइन्।
दोस्रो विकेटका लागि ओपनर सीता राना मगर र इन्दु बर्माले ८८ रनको कीर्तिमानी साझेदारी गरे।
यो साझेदारी महिला टी–२० आई खेलको उच्च साझेदारी हो। यसअघि इन्दु र सीताले नै दोस्रो विकेटका लागि ७० रनको साझेदारी गरेका थिए।
सीताले ३९ रन थपिन्। ३३ बलको सामना गरेकी उनले ५ चौका प्रहार गरिन्। सरिता मगर २१ को स्कोरमा रन आउट भइन्। डेब्यु म्याचमा कविता जोशी ८ रनमा नटआउट रहिन्।
नेपालले ओपनर काजल श्रेष्ठलाई ३ रनमै गुमाएको थियो। कप्तान रुबिना क्षेत्री शून्यमा रनआउट भइन्।
कतारका लागि एन्जेलिन मेर र सविजा पनायामले एक एक विकेट लिए।
इन्दुको अर्धशतक
इन्दुले टी-२० आइईमा कीर्तिमानी प्रदर्शन गरेकी छन। कतारविरुद्धको खेलमा अर्धशतक प्रहार गर्दै उनले टी–२० आईमा पहिलो अर्धशतक प्रहार गर्दै यो कीर्तिमान बनाएकी हुन्।
इन्दुले ४५ बलमा ४ चौका मद्दतमा अर्धशतक प्रहार गरेकी थिइन्। यसअघि टी-२० आईमा नेपाली महिला टोलीकी सीता राना मगरले सन् २०१९ मा इन्डोनेसियाविरुद्ध ४८ रन बनाएकी थिइन्।
कविता र संगीताको डेब्यु
अलराउन्डर कविता जोशीले कतारसँगको टी–२० आई सिरिजबाट राष्ट्रिय क्रिकेट टोलीमा डेब्यु गरेकी छन्। पहिलो पटक राष्ट्रिय टोलीमा परेकी कविताले कतारसँगको सिरिजबाट डेब्यु गरेकी हुन्।
प्रतिक्रिया