युनिकोड
आईसीसी टी२० विश्वकपअन्तर्गत सुपर १२ को समूह २ को खेलमा आज न्युजिल्यान्ड र भारत भिड्दै छन्।
खेल दुबई इन्टरनेशनल क्रिकेट स्टेडियममा साँझ पौने ८ बजे हुनेछ। शीर्ष दुईमा रहेर सेमिफाइनलमा स्थान बनाउनका लागि दुवै टोलीलाई जित्नैपर्ने दबाब छ।
यो समूहबाट ३ खेलमा लगातार जित निकाल्दै पाकिस्तानले सेमिफाइनलमा लगभग स्थान सुरक्षित गरेको छ। शीर्र्ष २ मा रहेर सेमिफाइनलमा स्थान बनाउन यी दुई टोलीलाई जितको विकल्प छैन।
यो समूहका टोलीलाई हेर्ने हो भने भारत र न्युजिल्याण्डमध्ये एकले सेमिफाइलनमा स्थान बनाउन सक्नेछन्।
पहिलो खेलमा हार भोगेका दुवै टोली पहिलो जित निकाल्दै अंक तालिकामा २ अंक जोड्न चाहन्छन्।
पहिलो खेलमा भारत पाकिस्तानसँग १० विकेटले पराजित भएको थियो। उता न्युजिल्यान्ड पनि पाकिस्तानसँगै ५ विकेटको हार भोगेको थियो।
आईसीसी प्रतियोगितामा भारतले न्युजिल्यान्डलाई १८ वर्षयता पराजित गर्नसकेको छैन। गत जुनमा भारतलाई ८ विकेटले हराउँदै न्युजिल्यान्डले टेस्ट च्याम्पियनसिप उपाधि जितेको थियो।
न्युजिल्यान्ड र भारतबीच अहिलेसम्म १६ टी–२० आई खेल भएको छ। तीमध्ये दुवै टोली समान ८ खेलमा विजयी भएका छन्।
पछिल्लो पाँच टी२० खेलमा भारत अपराजित छ। टी२० विश्वकपमा यी दुई टोलीबीचको दुई खेलमा नै न्युजिल्यान्ड विजयी भएको थियो।
आजै हुने पहिलो खेलमा अफगानिस्तान र नामिबिया भिड्दै छन्। दिउँसो पौने ४ बजे हुने खेलमा दुवै टोली जित निकाल्दै सेमिफाइनल यात्रा बलियो बनाउन चाहन्छन्।
सुपर १२ का २ खेलमध्ये १ मा जित र एकमा हार भोगेको अफगानिस्तान २ अंकमा तालिकाको दोस्रो स्थानमा छ।
एक खेलमा जित निकालेको नामिबिया २ अंकमा तेस्रो स्थानमा छ। अफगानिस्तान र नामिबिया आजको खेलमा जित निकाल्दै अन्तिम ४ को यात्रा जिवित राख्न चाहन्छन्।
प्रतिक्रिया