चर्चित स्ट्राइकर विमल घर्ती मगरले ‘ए’ डिभिजनको मछिन्द्र फुटबल क्लबसँग सम्झौता नवीकरण गरेका छन्।
काठमाडौंमा आइतबार पत्रकार सम्मेलन गरेर क्लबले विमलको सम्झौता नवीकरण गरिएको जानकारी दिएको छ।
क्लबका उपाध्यक्ष अनिल श्रेष्ठ र विमलले नवीकरण सम्झौता पत्रमा हस्ताक्षर गरेका छन्।
विमलले गत सिजन पनि मछिन्द्रबाटै खेलेका थिए। यस सिजनको ‘ए’ डिभिजन लिग फुटबल प्रतियोगिता कात्तिक २९ गतेदेखि सुरु हुँदैछ।
सम्झौता नवीकरणपछि विमलले टिमलाई उपाधि जिताउने प्रयास गर्ने बताए।
‘म क्लबलाई धन्यवाद दिन्छु । गत वर्ष एक खेल मात्रै खेल्न पाएको थिएँ। एक खेल खेलेरै उपाधि जितेँ', उनले भने, 'यो वर्ष सुरुवातमै खेल्ने प्रयास गर्नेछु। मेरो कोशिस उपाधि जित्ने हुन्छ।'
नेपालका लागि २६ खेल खेलेका उनले गत वर्ष बन्द प्रशिक्षणका क्रममा घाइते भएकाले लामो समय मैदान बाहिर रहनुपरेको थियो।
दाहिने खुट्टाको उपचारका लागि उनी गत पुसमा दाहिने घुँडामा चोट लागेपछि विमल उपचार गर्न कतार गएका थिए।
अखिल नेपाल फुटबल संघले कतार फुटबल संघसँग सहयोग लिएर विमलको उपचार गराएको हो।
Shares
प्रतिक्रिया