युनिकोड
मोहम्मद शहजाद र भीम सार्कीको शतकीय साझेदारीमा पोखरा राइनोजमाथि ९ विकेटको फराकिलो जित निकाल्दै चितवन टाइगर्स काठमाडौंमा जारी एभरेष्ट प्रिमियर लिग (ईपीएल) टी–२० क्रिकेटको प्लेअफमा पुगेको छ।
शानदार जितसँगै चितवन प्लेअफमा पुग्ने पहिलो टोली बनेको हो। ईपीएलमा अपराजित रहेको चितवनले ३ खेलबाट ६ अंक जोड्दै अंक तालिकाको शीर्ष स्थानमा छ।
चितवनसँग पराजित भए पनि पोखराको प्ले अफ पुग्ने सम्भावना बलियो छ।
शुक्रबार पोखरा राइनोजले दिएको १ सय २४ रनको मध्यम लक्ष्य चितवनले १४औँ ओभरको चौथो बलमा १ विकेटको क्षतिमा भेट्टायो।
दोस्रो विकेटका लागि मोहम्मद शहजाद र भीम सार्कीले १ सय २२ रनको अविजित साझेदारी गरेपछि चितवनले पोखरामाथि सहज जित निकालेको हो।
चितवनका लागि मोहम्मद शेहजाद ६३ र र भीम सार्की ५३ रनमा नटआउट रहे।
शहजादले ५२ बलमा ७ चौका र २ छक्का प्रहार गरे। भिम सार्कीले ४२ बलमा ५ चौका र २ छक्का हाने। ओपनर इशान पाण्डे शुन्य रनमा नै पवेलियन फर्के।
त्यसअघि कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको पोखराले ७ विकेटको क्षतिमा १ सय २३ रनको योगफल तयार पारेको थियो।
विवेक यादव ५३ र केस्रिक विलियम्स २ रनमा नटआउट रहे। पोखराका लागि विवेक यादवले ५३ रनको महत्वपुर्ण योगदान दिए। ४५ बलको सामना गरेका विवकेले ३ चौका र ३ छक्का हाने।
लगातार विकेट पतकपछि दबाबमा आएको पोखराका लागि छैटौँ विकेटका लागि असेला गुणारत्ने र विवेक यादवले ५६ रनको साझेदारी गरे। असेला गुणारत्ने २५ रनमा रन आउट भए।
ओपनर रिचार्ड लेभीले २० रन थपे। लोकेश बम ८, कप्तान विनोद भण्डारी ५ र रित गौतमले २ रन थपे। सुनिल धमाला शुन्य रनमा रनआउट भए।
चितवनका साहब आलम र कमल ऐरीले समान २ तथा सोमपाल कामीले एक विकेट लिए।
प्रतिक्रिया