पहिरो खस्दा महाकाली राजमार्ग अवरुद्ध

वर्षासँगै पहिरो खस्दा महाकाली राजमार्ग अवरुद्ध भएको छ। 

महाकाली राजमार्गमा पर्ने बैतडीको दोगडाकेदार-५ सलसेनास्थित साजाधारमा आज बिहान पहिरो खसेको स्थानीय शेरसिंह कार्कीले जानकारी दिए। 
    
उनले भने, ‘वर्षापछि सडक माथिबाट ठूलो पहिरो खसेको छ। सवारी आवागमन पूर्ण रुपमा अवरुद्ध छ।’ राजमार्ग अवरुद्ध हुँदा महेन्द्रनगर, धनगढी, काठमाडौँका साथै सदरमुकामसँगको सडक सम्बन्ध टुटेको छ। यात्रुहरु बीच बाटोमै रोकिएका छन्। 
 
यसैबीच अवरुद्ध जयपृथ्वी राजमार्ग भने सञ्चालनमा आएको छ। खोड्पे-बझाङ सडकखण्डको मुस्याखानमा पहिरो खस्दा अवरुद्ध राजमार्ग सञ्चालन आएको जिल्ला प्रहरीका प्रहरी निरीक्षक बलराम पाण्डेयले जानकारी दिए। रासस