महाकाली नदीमा बढ्यो पानीको वहाव, महेन्द्रनगर जलमग्न (फोटो फिचर)

सोमबार रातिदेखि परेको पानीले महाकाली नदीमा पानीको वहाव बढेपछि शारदा ब्यारेजमा आवतजावतमा रोक लगाइएको छ।

नेपालको पश्चिमी सीमा नदी महाकालीमा पानीको वहाव बढी भएपछि नेपालतर्फ आइरहेका तथा भारततर्फ गइरहेका सवारीसाधन ठप्प रहेका छन्। पानीको वहाव बढी भएपछि शारदा ब्यारेज भएर ओहोरदोहोर गर्ने चारपांग्रे सवारीसाधन ठप्प भएको जिल्ला प्रशासन कार्यालय कञ्चनपुरले जनाएको छ।

प्रमुख जिल्ला अधिकारी सुशील वैद्यका अनुसार महाकाली नदीमा पानीको वहाव प्रतिसेकेन्ड १ लाख १३ हजार क्युसेक रहेको छ। यस्तै अविरल वर्षाले महेन्द्रनगरआसपासका क्षेत्र जलमग्न भएका छन्। जिल्ला प्रशासन कार्यालय कञ्चनपुरका अनुसार भीमदत्त नगरपालिकाका वडा नम्बर १८, पुष्पलाल चोक, वडा नं. ३ नौलाखेत लगायतका क्षेत्र डुबानमा परेका छन् भने तिलकेनीमा ८÷१० घरमा पानी पसेको छ। जनज्योति स्कुलछेउ खोल्साको पानी बस्तीतर्फ छिरेको छ।

शुक्लाफाँटा नगरपालिकाबाट पूर्वतर्फ भने पानीको प्रभाव नदेखिएको जनाइएको छ। पहाडी जिल्लाहरूमा निरन्तर पानी परिरहेकोले महाकाली लगायत अन्य नदीनालामा समेत पानी बढ्न सक्ने भएकाले स्थानीयहरुलाई सचेत र सुरक्षित रहन जिल्ला प्रशासन कार्यालयले आग्रह गरेको छ।