पोखरामा निषेधाज्ञा खुकुलो, ट्याक्सी र निजी सवारीलाई जोर–बिजोर प्रणाली

जिल्ला प्रशासन कार्यालय कास्कीले प्रावधानहरु खुकुलो बनाउँदै भदौ २० गतेसम्म निषेधाज्ञा जारी राख्ने निर्णय गरेको छ।

शुक्रबार कास्कीका प्रमुख जिल्ला अधिकारी ज्ञानप्रसाद ढकालद्वारा जारी सूचनामा भदौ २० गतेसम्म जोर बिजोर प्रणाली अनुरुप ट्याक्सी र निजी सवारी साधन चलाउने छुट दिएको छ भने सार्वजनिक यातायातमाथिको बन्देज कायमै राखिएको छ। ती सवारी साधन बिहान ६ बजेदेखि रातको ८ बजेसम्म मात्रै चल्न पाउनेछन्।

यसैगरि यो अवधिमा साँझ ७ बजेसम्म ‘टेक अवे’ अर्थात् खानेकुरा लैजान मिल्नेगरि रेस्टुरेन्ट संचालनको स्वीकृति दिइएको छ। सरकारी तथा गैरसरकारी कार्यालयहरु एवं बैंक तथा वित्तीय संस्थाले यो अवधिमा सामाजिक दूरी कायम गर्दै संचालन स्वीकृति पाएका छन्।

निर्माण क्षेत्र तथा उद्योगहरुहरुले कामदार तथा सेवा प्रवाहलाई सुरक्षित बनाइ सबै प्रकारका काम गर्न पाउने भएका छन्। भीडभाड हुने पार्टी प्यालेस, स्कूल र कलेज, फनपार्क, रंगशाला,ब्यूटीपार्लर, सैलुन, फिटनेस सेन्टर, स्वीमिङ पुल, फुटसललगायतका क्षेत्रमाथिको प्रतिबन्ध कायमै राखिएको छ।

जात्रा, महोत्सव, सामाजिक तथा सांस्कृतिक कार्यक्रममाथिको प्रतिबन्ध पनि कायमै छ। शुक्रबार १२ बजे रातिसम्मको लागि लगाइएको निषेधाज्ञाको समयावधि सकिनुअघि कास्की प्रशासनले नयाँ सूचना जारी गरेको हो।

यसअघि शुक्रबार नै पोखरा महानगरपालिकाले निषेधाज्ञा खुकुलो बनाउन जिल्ला प्रशासन कार्यालयलाई अनुरोध गरेको थियो। कोरोना संक्रमण बढेपछि भदौ २ गतेदेखि कास्कीमा निषेधाज्ञा जारी गरिएको थियो। एकहप्ताको लागि जारी निषेधाज्ञालाई पुनः ५ दिन बढाइएको थियो।