पोखरामा कोरोना संक्रमित ६२ वर्षीय पुरुषको मृत्यु

कोरोना भाइरस संक्रमणको कारण पोखरामा एक पुरुषको मृत्यु भएको छ।

पोखरा स्वास्थ्य विज्ञान प्रतिष्ठानमा उपचारको क्रममा पोखरा महानगरपालिका-१९ निवासी ६२ वर्षीय पुरुषको मृत्यु भएको हो।

प्रतिष्ठानका निर्देशक डा.अर्जुन आचार्यका अनुसार उनको गएराति साढे ११ बजे मृत्यु भएको हो। स्वाब परीक्षण गर्दा उनमा कोरोना संक्रमण पाइएको थियो।

मेधुमेहका समेत बिरामी ती पुरुषमा स्वास्थ्यमा थप समस्या देखिएपछि १७ साउनमा अस्पताल भर्ना भएका थिए।

आईसीयूमा राखेर उपचार गरिए पनि उनलाई बनाउन नसकिएको आचार्यले बताए। यो सँगै नेपालमा कोरोना संक्रमणको कारण ज्यान गुमाउनेको संख्या ७४ पुगेको छ।

पोखरामा मात्रै अहिलेसम्म तीन संक्रमितले ज्यान गुमाइसकेका छन्। संक्रमणको कारण ज्यान गएको पछिल्लो घटनाको भने स्वास्थ्य मन्त्रालयले पुष्टि गर्न बाँकी छ।