टिपरले भाँचेको रुखको हाँगोले लागेर छहारीमा बसेकी महिलाको मृत्यु

सर्लाहीको ब्रम्हपुरी गाउँपालिका ६ नोकेल्वामा टिपरले भाँचेको रुखको हाँगाले लाग्दा एक महिलाको मृत्यु भएको छ। घटनामा अर्की एक महिला गम्भीर भएकी छिन्।

आइतवार साँझ ना ४ ख ५४४८ नम्बरको टिपरको हाइड्रोलिकले पिपलको हाँगो भाँच्दा चौतारीमा बसेकी सोही ठाउँकी ४५ वर्षीया कैलासिया देवीको घटनास्थलमै मृत्यु भएको सर्लाहीका एसपी विश्वमणी सुवेदीले जानकारी दिए।

घटनामा सोही ठाउँकी ४० वर्षीया प्रमिला देवी गम्भीर घाईते भएकी छिन्। उनलाई जिल्ला अस्पताल मलंगवामा सामान्य उपचार गरी थप उपचारका लागि वीरगञ्ज रेफर गरिएको प्रहरीले जनाएको छ।

घटनापछि टिपर चालकलाई प्रहरीले पक्राउ गरेको छ। गिटी झारेपछि हाइड्रोलिकले टिपरको ढाला उठाउने क्रममा पिपलको हाँगो भाँचिएको स्थानीयले बताएका छन्।