युनिकोड
बाजुरा र हुम्ला दुई जिल्लाको सीमा विवादले उग्र रुप लिएपछि तीन दिनदेखि तनावग्रस्त बनेको छ। बाजुरा र हुम्लाको सीमा क्षेत्र रानीसैन–लाम्पाटा च्याचौर क्षेत्रमा उत्पन्न सिमाना विवाद हिंसात्मक बनेपछि ६ जना गम्भीर घाइते भएर हेलिकोप्टरबाट उद्धार नै गर्नुपर्यो।
सीमा क्षेत्र लाम्पाटामा बाजुरा प्रहरीले अस्थायी प्रहरी चौकी स्थापनाका लागि भवन निर्माणको काम अघि बढाएपछि उक्त क्षेत्र हुम्लामा पर्ने भन्दै विवाद बढेको थियो। साइपालको आधार शिविर रानीसैन जान लागेको बाजुराको हिमाली गाउँपालिकाको टोलीमाथि हुम्लाको सर्केगाडको रिपगाउँ र खार्पुनाथका राय, थालीगाउँका युवाहरूको समूहले आक्रमण गरेपछि स्थिति तनावपूर्ण बन्यो।
कुटपिटबाट घाइते भएका वडा सदस्यसमेत रहेका हिमाली– ३, लाम्पाटाका पेमा गाराप गुरुङ, उनकी श्रीमती लक्ष्मी गुरुङ, सोही वडाको गुम्बा गाउँका नरबहादुर गुरुङ र मीनु कुँवरलाई हेलिकोप्टरबाट सुर्खेत ल्याइयो। स्थानीयको कुटपिटबाट हिमाली गाउँपालिकाका प्रमुख प्रशासकीय अधिकृत कुलबहादुर थापा र प्रहरी सहायक हवल्दार महेश धामी पनि घाइते भएका छन्।
घटना मंगलबार बिहान साढे १० बजेतिरको भएपनि ढिलो गरी बाहिरिएको हो। घटनास्थल र नजिकको गुम्बा गाउँमा फोन लाग्दैन। करिब आधा दिन पैदल हिँडेर वडा नम्बर ३ को बौडी भन्ने ठाउँमा पुगेपछि मात्र फोनले काम गर्छ। जसका कारण दुई जिल्लाको सीमा विवाद एक दिनपछि मात्रै बुधबार बाहिरिएको हो।
साइपाल जान लागेको धनगढी उपमहानगरपालिकाका मेयर गोपी हमालको टोलीलाई पनि युवा समूहले लखेटेको थियो। हिमाली गाउँपालिका अध्यक्ष गोविन्दबहादुर मल्लको नेतृत्वमा जनप्रतिनिधि, कर्मचारी र स्थानीय गरी ३६ जनाको टोली रानीसैनको पर्यटन प्रवद्र्धनका लागि रानीसैन बहस गर्न भनेर त्यसतर्फ जाँदै थियो। तर, हुम्लाको खार्पुनाथ र सर्केगाडका तीनवटा गाउँबाट करिब डेढ सय संख्यामा रहेको टोलीले सबैलाई लखेटेको भिडिओ सार्वजनिक भएको छ।
हुम्ला र बाजुराको सीमा विवादको घटनाले संसदमा पनि प्रवेश पाएको छ। सांसद केपी खनालले हुम्ला र बाजुराको सीमा रानीसिंह क्षेत्रको विवादका कारण धनगढी उपमहानगरपालिकाका प्रमुख गोपी हमालसहितको समूहमाथि दुव्र्यवहार भएकोप्रति सरकारको ध्यानाकर्षण गराए।
बाजुराका नेपाली कांग्रेसका सांसद जनकराज गिरीले यो घटनाको निष्पक्ष छानबिनको माग गरेका छन्। उनले प्रहरीको अस्थायी चौकी समेत बनाउन केही अराजक जत्थाले अवरोध गरेको जिकिर गरे।
त्यस्तै, हुम्लाका नेपाली कांग्रेसका सांसद जयपती रोकायाले बाजुराले कर्णाली राजमार्ग अवरुद्ध गरेको आरोप लगाए। राष्ट्रिय राजमार्ग नै बन्द गरेर जनतालाई सास्ती दिइएको उनको भनाई छ। सीमा विवाद तत्काल टुंगो लगाउन सरकारलाई रोकायाले आग्रह गरे।
लामो समयदेखि सीमा विवाद रहेको रानीसैन र लाम्पाटा क्षेत्रमा बाजुरा प्रशासनले प्रहरी चौकी निर्माण सुरु गरेपछि विवादले उग्ररुप लिएको थियो। निक्कै चर्किएको सीमा विवाद समाधानका लागि दुई जिल्लाका दुई सांसद गिरी र रोकायाले छलफल गरेर टुंगोमा पुग्ने सहमति गरेपनि विवाद सुल्झिएको छैन।
प्रतिक्रिया