सिन्धुलीमा गाडीको ठक्करबाट पैदलयात्रीको मृत्यु, चालक पक्राउ

सिन्धुलीमा बुधबार बिहान गाडीले ठक्कर दिँदा एकजना पैदल यात्रीको मृत्यु भएको छ। 

बुधबार बिहान साढे सात बजेतिर दुधौली नगरपालिका ४ कमलाखोँचमा प्र.१-०२-००२ च ५४२५ नम्बरको कुरियर लोड पिकअप गाडीले ठक्कर दिँदा दुधौली ४ गिजिह्यानी निवासी पुरुषको मृत्यु भएको हो। 

मृत्यु हुनेमा स्थानीय ६५ वर्षीय मोहन धामी रहेका छन्। 

पैदल हिँडिरहेको बेला उनलाई गाडीले ठक्कर दिँदा टाउको र शरीरका विभिन्न ठाउँमा चोट लागेको थियो।
 

गम्भीर घाइते उनलाई उपचारको लागि स्थानीय कमलाखोँच अस्पताल लगिएको थियो।  त्यहाँ सामान्य उपचार पश्चात थप उपचारको लागि नगर अस्पताल सिर्थौली लगिएकोमा उनको उपचारको क्रममा मृत्यु भएको प्रहरीले जनाएको छ। 

ठक्कर दिने पिकअप र त्यसका चालक झापा सिवसतासी नगरपालिका ७ बस्ने वर्ष २९ का अभिशेक अधिकारीलाई प्रहरीले पक्राउ गरेको छ।