न्युयोर्कको सबैभन्दा ठूलो स्वास्थ्य संस्थामा भेन्टिलेटरमा राखिएका लगभग सबै कोरोना संक्रमितको मृत्यु

न्युयोर्कको सबैभन्दा ठूलो स्वास्थ्य सेवा प्रणालीमा भेन्टिलेटरको आवश्यकता परेका लगभग सबै कोरोना संक्रमित बिरामीको मृत्यु भएको एक अध्ययनले देखाएको छ।

नर्थवेल हेल्थ नामक सो स्वास्थ्य सेवा प्रदायक नेटवर्कमा उपचार गराएकामध्ये २० प्रतिशतको मृत्यु भएको थियो। त्यस्तै भेन्टिलेटर लगाइएकामध्ये ८८ प्रतिशत बिरामीको मृत्यु भएको हो।

बिरामी आफैँले सास फेर्न गाह्रो हुन थालेपछि भेन्टिलेटर लगाइन्छ।

अध्ययनमा नर्थवेल हेल्थमा भर्ना भएका ५ हजार ७ सय बिरामीको तथ्यांक हेरिएको थियो। अध्ययनमा समेटिएकामध्ये १२ प्रतिशतलाई मात्र भेन्टिलेटरको आवश्यकता परेको थियो। सो अध्ययन अमेरिकन मेडिकल एसोसियसनको जर्नलमा प्रकाशित छ।