युनिकोड
पेप्सीकोलाको सनसिटी अपार्टमेन्टमा रहेका २९८ जनाको कोरोना परीक्षण सकिएको छ। परीक्षण भएका सबैको रिपोर्ट नेगेटिभ आएको बताइएको छ।
पहिलो चरणमा संक्रमित भेटिएका ‘ए’ ब्लकका २ सय ४२ जना र उनीहरुकोमा आउजाउ गरेका गरी जम्मा २९८ जनाको र्यापिड टेस्ट गरिएको थियो। उनीहरु सबैको रिपोर्ट नेगेटिभ आएको कागेश्वरी मनोहरा नगरपालिकाका मेगर कृष्णहरि थापाले बताए।
‘आज टेस्ट गरिएका २९८ जनाको रिपोर्ट नेगेटिभ आएको छ’, नेपालखबरसँग कुरा गर्दै मेयर थापाले भने, ‘बाँकीको परीक्षण भोलिबाट क्रमशः अगाडि बढ्छ।’
मेयर थापाले अपार्टमेन्डमा रहेका र उनीहरुसँग सम्पर्कका आएका सबैको परीक्षण गरिने बताइएको छ।
सनसिटी अपार्टमेन्टका ४ सय ८० फ्ल्याटमा एक हजार ८८ जना छन्। पहिलो चरणको रिपोर्टपछि अरुको परीक्षण के गर्ने भन्ने स्वास्थ्य सेवा विभागले निर्णय गर्नेछ।
बुधबार संक्रमिण भेटिएका परिवारको घरमा कार्यरत दुई जनाको पनि परीक्षण गरिएको छ।
सोमबार यहाँ रहेका तीन जनालाई कोरोना संक्रमणको आशंकामा पाटन अस्पताल भर्ना गरिएको थियो। ती मध्य दुई जनामा कोरोना संक्रमण पुष्टि भएपछि त्यहाँ रहेका सबैको कोरोना परीक्षण गर्ने सरकारले निर्णय गरेको थियो।
संक्रमित परिवारका तीन जना चैत ४ गते बेलायतबाट दोहा हुँदै काठमाडौं फर्किएका थिए।
उनीहरुसँगै कतार एयरलाइन्समा दोहाबाट फर्किएकाको पनि प्रहरीले खोजी सुरु गरेको छ। उक्त विमानमा १ सय ५३ जना फर्किएका थिए। सनसिटीमा अहिले आवतजावत पूर्णरुपमा बन्द गरिएको छ।
अपार्टमेन्टमा रहेका परिवारलाई खाद्य सामग्रीका लागि त्यही लगिदिने गरी ग्रोसरीसँग मिलेर व्यवस्था गरिएको छ । ग्रोसरीले नै सबै सामग्रीको प्याकेट ल्याएर गेटमा छाडिदिने छ।
प्रतिक्रिया