युनिकोड
राष्ट्रिय विपद् जोखिम न्यूनीकरण तथा व्यवस्थापन प्राधिकरणले आज असार १४ गते रातिदेखि पर्सि असार १६ गते बिहानसम्म कर्णाली, सुदूरपश्चिम र लुम्बिनी प्रदेशका विभिन्न स्थानमा भारीदेखि धेरै भारीसम्म वर्षा हुने सम्भावना रहेकाले उच्च सतर्कता अपनाउन सुझाव दिएको छ।
प्राधिकरणले शनिबार साँझ जारी गरेको सूचनाअनुसार यस अवधिमा लुम्बिनी प्रदेशका बाँके, बर्दिया र दाङ, कर्णाली प्रदेशका सुर्खेत, दैलेख र सल्यान, सुदूरपश्चिम प्रदेशका बैतडी, डडेल्धुरा, डोटी, अछाम, कैलाली र कञ्चनपुर तथा अन्य प्रदेशका पहाडी भूभागका एक-दुई स्थानमा भारीदेखि धेरै भारीसम्म वर्षा हुने सम्भावना देखिएको हो।
अत: ठूलो वर्षाका कारण ती जिल्ला वा क्षेत्रमा भूक्षय, बाढी, पहिरो, डुबान तथा गेग्य्रान बहावको जोखिम रहेकाले उच्च सतर्कता अपनाउन र बच्ने उपाय अपनाउन प्राधिकरणले सल्लाह दिएको छ।
भारीदेखि धेरै भारी वर्षा हुने सम्भावना रहेका जिल्ला तथा स्थानका लागि विपद् व्यवस्थापन प्राधिकरणले ८ बुँदे चेतावनी जारी गरेको छ।
हेर्नुहोस्:
क. यस अवधिभर अत्यन्त जरुरी अवस्थाबाहेक यात्रा नगर्ने।
ख. मौसमी बुलेटिनहरूको अद्यावधिक जानकारी लिइराख्ने।
ग. डुबान हुनसक्ने क्षेत्रका भुइँतलामा बस्ने नागरिकले विशेष सतर्कता अपनाउने।
घ. नदी किनाराका बस्तीमा उच्च सतर्कता अपनाउने। सकेसम्म नदी किनारमा नजाने।
ङ. नदी किनारका निर्माण कार्य स्थगन गर्ने।
च. उच्च जोखिम रहेका जिल्लाका विपद् व्यवस्थापन समिति एवं सुरक्षा समितिले सवारी आवागमनबारे आवश्यक निर्णय गर्ने। सोको पालना सबैले गर्ने।
छ. प्रतिकार्यका लागि तीनवटै सुरक्षा निकाय, स्थानीय तह एवं स्वयंसेवकलगायत सरोकारवाला निकाय तयारी अवस्थामा
रहने।
ज. पूर्वतयारी, पूर्वकार्य र प्रतिकार्यमा सहयोग गर्ने साझेदार संस्थाहरूले जिल्ला विपद् व्यवस्थापन समिति र स्थानीय विपद् व्यवस्थापन समितिसँगको समन्वयमा अलर्टमा रहने।
हेर्नुहोस् विपद् प्राधिकरणले जारी गरेको सूचना:
प्रतिक्रिया